కాదంబరి జెత్వానీ కేసులో నిందితుడుగా అరెస్టు అయి రిమాండ్ ఖైదీగా ఉన్న ఐపీఎస్ అధికారి పి ఎస్ ఆర్ ఆంజనేయులును జైల్లో పరామర్శించడమే కాకుండా ఆ తర్వాత విలేకరుల సమావేశం పెట్టి మరీ సమర్థించిన మాజీ ఎంపి ఉండవల్లి అరుణ్ కుమార్ పై బ్రాహ్మణ సంఘాలు తీవ్రంగా ధ్వజమెత్తాయి. ఈ మేరకు సామాజిక మాధ్యమాలలో ఆనాటి ఎన్జీవో నాయకుడు సూర్యనారాయణ చేసిన వ్యాఖ్యల వీడియోను కూడా జతచేసి ఉండవల్లి అరుణ్ కుమార్ ఆనాడు ఏం చేశారు అంటూ ప్రశ్నిస్తున్నారు. పీఎస్ ఆర్ ఆంజనేయులు బ్రాహ్మణ సామాజిక వర్గానికి చెందిన వారని ఉండవల్లి అరుణ్ కుమార్ భావిస్తే మరి సూర్యనారాయణ కూడా అదే సామాజిక వర్గానికి చెందిన వ్యక్తి కదా? మరి ఆయనను పీఎస్ఆర్ ఆంజనేయులు చంపుతానని బెదిరించినప్పుడు సంఘీభావం వ్యక్తం చేశారా అని ప్రశ్నిస్తున్నారు.
ఉండవల్లి గారూ,
గుర్తున్నారా సూర్యనారాయణ గారు. ప్రభుత్వ ఉద్యోగుల నాయకుడు… న్యాయం కోసం పోరాడే గొంతుక! ఆ గొంతుకను నొక్కే ప్రయత్నం జగన్ హయాంలో జరిగింది.
సూర్యనారాయణ గారు, ఒక ఉద్యోగుల నాయకుడిగా, వారి హక్కుల కోసం నిలబడ్డారు. కానీ, ఆయన గొంతు నొక్కడానికి, భయభ్రాంతులకు గురిచేయడానికి గన్ ఎక్కుపెట్టారు. పి.ఎస్.ఆర్. ఆంజనేయులు గారు ఆ చర్యకు పాల్పడ్డారు.
ఆ రోజు, ఆ నిస్సహాయ క్షణాల్లో, ఒక ప్రభుత్వ ఉద్యోగుల నాయకుడిని భయపెట్టారు. అతని ధైర్యాన్ని, అతని న్యాయ పోరాటాన్ని అణచివేయడానికి ప్రయత్నించారు.
ఉండవల్లి గారూ, ఆ రోజు మీరు ఎక్కడ ఉన్నారు? ఆ భయానక వాతావరణంలో, ఒక నాయకుడికి అండగా నిలబడాల్సిన మీరు, ఎందుకు మౌనం వహించారు?
ఇప్పుడు, రాజకీయ అవసరాల కోసం, మీరు ఆంజనేయులు గారికి వకాల్తా పుచ్చుకుంటున్నారు. సూర్యనారాయణ గారు, కేవలం బ్రాహ్మణ సామాజిక వర్గానికి చెందిన వ్యక్తి మాత్రమే కాదు, ప్రభుత్వ ఉద్యోగుల హక్కుల కోసం పోరాడిన నాయకుడు. అతనిని భయపెట్టడం, అతని గొంతు నొక్కడం, న్యాయమా? ధర్మమా?
ఉండవల్లి గారూ, మీ రాజకీయ నాటకాలు, మీ ద్వంద్వ ప్రమాణాలు, ఇక చెల్లవు. కూటమి ప్రభుత్వం న్యాయం చేస్తుంది. తప్పు చేసిన వాళ్ళు ఎవరైనా సరే, చట్టం తన పని తాను చేసుకుపోతుంది.
ఒక ప్రభుత్వ ఉద్యోగుల నాయకుడిని భయపెట్టిన వాళ్ళు, న్యాయం నుండి తప్పించుకోలేరు. మీ మౌనం, ఆ నాయకుడికి క్షమాపణ చెప్పలేదు. మీ కపటత్వం, ఇక ఎవరినీ మోసం చేయలేదు. మీ విష మేథో రాజకీయ క్రీడలు, ఇక చెల్లవు.
