వంటింటి ఘుమ ఘుమలు

ముచ్చటైన నా వంటిల్లు

తళతళలాడే వంటగిన్నెల పొదరిల్లు

యుధ్ధమే అనిపించే కత్తులు కటార్ల ఆరళ్లు

నేను పాలించే నా  నట్టిల్లు

పసందైన రుచులకు పుట్టిల్లు

నా చేతి వంటల హరివిల్లు

కాఫీ టీల పొగలు సెగల చిరుజల్లు

సిప్పు సిప్పుకి  మనసు తెప్పరిల్లు

పోపులు నూనెల ఘుమఘుమల వాకిళ్ళు

రా రమ్మని పిలిచే మసాలాల లోగిళ్లు

జిహ్వ చాపల్యాన్ని పెంచే రోటిపచ్చళ్ళు

నేడు కానరాని రోళ్ళు రోకళ్ళు

ఘాటుఉల్లిపాయతోనే మరి కళ్ళు చిప్పిల్లు

గరిట గమకాలతో మనసు రంజిల్లు

మిక్సీ శబ్దాలతో చెవులు హోరిల్లు

హుషారునిచ్చే కుక్కర్ విజిళ్ళు

మాడిన కూరలు చూసి మనసు భీతిల్లు

పండుగలు పబ్బాలకు నిద్రలేని రాత్రుళ్ళు

అసలునే మించే కొసరు చిరుతిళ్లు

విరామము లేని వంటల సందళ్ళు

చేసి చేసి వొళ్ళు డల్లు డల్లు

చూసి చూసి వంటలంటేనే వేవిళ్ళు

అయినా తప్పదు చేసుళ్ళు

మరి హోటల్ భోజనానికిక చెల్లు చెల్లు

లేదంటే  పడునులే జేబుకు చిల్లు

కట్టలేక లబోదిబో హాస్పిటల్ బిల్లు

మంజుల సూర్య, హైదరాబాద్