సుమసిరి

తెలంగాణా సంస్కృతిలో

ప్రత్యేక సుమశృంగమే

బతుకమ్మపండుగ

మహాలయ అమావాస్యతో

ఎంగిలి పూబతుకమ్మ తొలిగా

సద్దులబతుకమ్మ మలిగా

తొమ్మిదిరోజులు నయనానంద సంబరం

ఈ పండుగ  శరన్నవ రాత్రుల్లో

తొలిచలి, వర్షపు చినుకుల సవ్వడిలో

గునుగు, తంగేడు,బంతి

చామంతి,గులాబి,నందివర్ధనాలతో

రంగురంగుల పూలశిఖరాలను పేర్చి

ఆవిష్కృత సుమ సోయగాల చుట్టూ

అలంకృత అంగనలు

చప్పట్లు చరుస్తూ వలయంగా తిరుగుతూ

ఒకేలయతో పాటలు పాడుతూ

జరుపుకోవటం ఆనవాయితి

ఈ పాటలు మహిళల కష్టసుఖాలు

ప్రేమ,స్నేహం,బంధుత్వం,ఆప్యాయత

భక్తి,భయం,చరిత్ర,పురాణాలను ప్రతిబింబిస్తాయి

పూల సింగిడికి రోజుకో

నైవేద్య సమర్పణ ప్రత్యేకత

ఆడపడుచులు అత్తారింటి నుంచి

అమ్మగారింటికి చేరుకొని

గౌరి దేవిని కీర్తిస్తూ,ఒక్క చోట చేరి

ఆడిపాడి వాయినాలు

ఇచ్చిపుచ్చుకొనే పండుగ

అందరూ ఊరేగింపుగా

జలాశయం చేరి భక్తిశ్రద్ధలతో

సుమసోయగాలను మెల్లగా

నీటిలో జారవిడిచి,బతుకమ్మా

మాకు సంతోషకరమైన

బతుకునీవమ్మా  అని వేడుకునే వేడుక

సంధ్య సుత్రావె, సుల్తాన్షాహి,హైద్రాబాద్, ఫోన్:9177615967