ఉక్రెయిన్ పై యుద్ధాన్ని కొనసాగిస్తున్న రష్యా తాజాగా ఒక దారుణ దాడి చేసింది. ఆదివారం ఉదయం ఉత్తర ఉక్రెయిన్ నగరం సుమీ నడిబొడ్డున రెండు రష్యన్ బాలిస్టిక్ క్షిపణులు దూసుకెళ్లడంతో ముప్పై రెండు మంది మరణించగా, 80 మందికి పైగా గాయపడ్డారని ఉక్రెయిన్ అధికారులు తెలిపారు. ఈ సంవత్సరం ఉక్రెయిన్‌పై జరిగిన అత్యంత దారుణమైన దాడులలో ఒకటైన ఈ దాడిని అధ్యక్షుడు వోలోడిమిర్ జెలెన్స్కీ ఖండించారు. మాస్కోపై కఠినమైన అంతర్జాతీయ ప్రతిచర్యకు పిలుపునిచ్చారు.
“కేవలం దుష్టులు మాత్రమే ఇలా వ్యవహరించగలరు. సాధారణ ప్రజల ప్రాణాలను తీస్తున్నారు” అని జెలెన్స్కీ సోషల్ మీడియాలో వాపోయారు. నేలపై శవాలు, ధ్వంసమైన బస్సు, నగర వీధి మధ్యలో కాలిపోయిన కార్లను చూపించే ఒక భయానక వీడియోను ఆయన షేర్ చేశారు.. “ప్రజలు చర్చికి వెళ్ళే రోజు, ప్రభువు జెరూసలేంలోకి ప్రవేశించిన పండుగ. అయినా రష్యా అతి కిరాతకంగా ప్రవర్తించింది” అని ఆయన అన్నారు.
రష్యా బాలిస్టిక్ దాడి జరిగినప్పుడు ప్రజలు వీధుల్లో, వాహనాల్లో, ప్రజా రవాణాలో, తమ భవనాల్లో ఉన్నారని అంతర్గత మంత్రి క్లైమెంకో అన్నారు. “ఒక ముఖ్యమైన చర్చి పండుగ రోజున పౌరులను ఉద్దేశపూర్వకంగా నాశనం చేయడం” అని ఆయన అన్నారు. జెలెన్స్కీ చీఫ్ ఆఫ్ స్టాఫ్ ఆండ్రీ యెర్మాక్ మాట్లాడుతూ, క్షిపణుల్లో క్లస్టర్ మందుగుండు సామగ్రి ఉందని అన్నారు. “వీలైనంత ఎక్కువ మంది పౌరులను చంపడానికి రష్యన్లు ఇలా చేస్తున్నారు” అని ఆయన అన్నారు. ఉక్రెయిన్ సెంటర్ ఫర్ కౌంటర్ డిస్ఇన్ఫర్మేషన్‌ను నిర్వహిస్తున్న భద్రతా అధికారి ఆండ్రీ కోవెలెంకో, అమెరికా రాయబారి స్టీవ్ విట్‌కాఫ్ మాస్కోను సందర్శించిన తర్వాత ఈ దాడి జరిగింది.
“రష్యా ఈ దౌత్యం అంతా … పౌరులపై దాడుల చుట్టూ నిర్మిస్తోంది” అని ఆయన టెలిగ్రామ్‌లో రాశారు. ఆదివారం జరిగిన దాడి తర్వాత, ఉగ్రవాదంగా తాను అభివర్ణించిన దానికి ప్రతిస్పందనగా రష్యాపై కఠినంగా వ్యవహరించాలని జెలెన్స్కీ అమెరికా మరియు యూరప్‌లకు పిలుపునిచ్చారు. “రష్యా సరిగ్గా ఇలాంటి ఉగ్రవాదాన్నే కోరుకుంటోంది. ఈ యుద్ధాన్ని కొనసాగిస్తున్నది. దురాక్రమణదారుడిపై ఒత్తిడి లేకుండా, శాంతి అసాధ్యం. చర్చలు బాలిస్టిక్ క్షిపణులు మరియు వైమానిక బాంబులను ఎప్పుడూ ఆపలేదు” అని ఆయన వ్యాఖ్యానించారు.
రష్యా ఫిబ్రవరి 2022లో ఉక్రెయిన్‌పై పూర్తి స్థాయి దండయాత్రను ప్రారంభించింది. ప్రస్తుతం తూర్పు మరియు దక్షిణ ప్రాంతాలలో దేశంలోని 20% భూభాగాన్ని ఆక్రమించింది. క్షిపణి మరియు డ్రోన్ దాడులు ఇప్పుడు యుద్ధంలో ఆధిపత్యం చెలాయిస్తున్నప్పటికీ, ఇటీవల రష్యా దళాలు తూర్పున నెమ్మదిగా ముందుకు సాగుతున్నాయి. ఉక్రెయిన్, రష్యా గత నెలలో ఒకరి ఇంధన సౌకర్యాలపై దాడులను నిలిపివేయడానికి అంగీకరించాయి. అయితే ఇరుపక్షాలు ఆ తాత్కాలిక నిషేధాన్ని ఉల్లంఘించాయని ఒకరినొకరు పదేపదే ఆరోపించుకున్నాయి.
