నా దారి అటువైపే…….

ఆకుపచ్చని తనాలను కోరుకుంటే

కాంక్రీట్ శిధిల దృశ్యాలు దర్శనమిస్తున్నాయి

శ్రమైక జీవన సౌందర్యాలను వీక్షించాలనుకుంటే

కొత్త కొత్త వైరస్ దాడుల రోగాలు వికృతంగా

వికటాట్టహాసం చేస్తున్నాయి

అడవి మల్లెల నవ్వులు కావాలనుకుంటే

నల్లమలలపై దుష్టశక్తుల డేగకళ్ళు

ధ్వజమెత్తి విన్యాసం చేస్తున్నాయి

పచ్చని పంట పొలాలు చూడాలనుకుంటే

ఎడారి భూములు వెక్కిరిస్తున్నాయి

ఛిద్రమైన వలస బతుకులు

చిగురించని కొత్త చిగుళ్లు

నిలువెత్తు దేవుళ్ళు కొలువైన కోవెలలు

దర్శించుకుందామంటే

వెలవెల బోయి వెక్కిరిస్తున్నాయి

చదువులమ్మ తల్లి వొడిలో బడిలో

గురువుల నీడలో చదువుకుందామంటే

పాఠశాల ప్రాంగణాలన్నీ

లాక్ డౌన్ తాళాలతో పరిహసిస్తున్నాయి

జలధారలతో పుడమి పులకిస్తుందనుకుంటే

కన్నీటిధారలు వరదలై చెలరేగుతున్నాయి

ప్రస్తుత ధరిత్రి చరిత్ర పఠిస్తుంటే

‘కరోనా ‘ కడగండ్లు

ఇప్పుడు ఉదయాలు కరువై

అంధకారంలో హృదయాలు అలమటిస్తున్నాయి

ఉరుకులు పరుగులతో పడమటి పయనాలు

డాలర్లతో తూకమేసుకుంటున్ప జన ప్రవాహాలు

ఎవేవో మస్తిష్కంలో దూరి విస్పోటనం చెందుతూ

నిన్నటి బంధాల్ని బంధుత్వాన్ని, స్నేహవారధుల్పి

లోలోపల గాయాలు చేస్తూ

నిలువునా కూల్చేస్తున్నాయి

కదిలే కాలాన్ని ఇదేమని ప్రశ్నిస్తే

ఇది వైరస్ మహామారి మాయరోగ

మాస్కుల కాలమని

మానవ బంధాలు మృగ్యమని సెలవిస్తుంది

ఇప్పుడు నాకు నవ్యత్వం కావాలి

నవ్యత్వం అంటే………

మానవత్వం పరిమళించే దిశగా

సమాజ గమనం సాగాలి

నా దారి  అటువైపే ……

కె.హరనాథ్

9703542598