ఎటు చూసినా సూక్ష్మజీవుల రాజ్యము
మనుషులను తమకు గులాములను చేసుకుంటూ
మనసులను భయం గుప్పిట్లో బిగించేస్తూ
మాస్కులతో స్వేచ్ఛను కబళిస్తూ
ప్రశాంతంగా కనిపిస్తున్న నిశ్శబ్ద అశాంతి ప్రపంచం
ప్రకృతి తనకు ప్రాణభిక్షను పెట్టమంటూ
సునామి భూకంపాలతో తన అనారోగ్య పరిస్థితిని తెలుపుతూనే ఉంది
తనను కాపాడమని వేడుకుంటూనే ఉంది
కానీ డబ్బు హోదాల పరుగుల వేటలో
పట్టించుకునే తీరికేది
సమతుల్యత సమాధి కాబోతున్నా మనిషిలో చలనమేది
శపించబడ్డాము మనం మన స్వయం కృతాపరాధాలతో
అందుకే రోజు రోజుకి విలువ పెంచుకుంటున్నాయి ఇంద్రియాలు
ముట్టుకుంటే మరి ప్రాణమే వాటి ఖరీదు
సంప్రదాయాల వేర్లని వేరుచేసిన మనమే నేడు మళ్ళీ వేళ్లూనుకునే దిశగా మొదలుపెట్టాము ప్రయత్నాలే
ఐనా చేసిన పాపం ఊరికే పోతుందా
ఆ ప్రక్షాళనలో ఎందరి ప్రాణాలు బలికావాలో
ఎందరి ఆకలి కేకలు మారుమ్రోగాలో
ఇంతటి కల్లోల పరిస్థితిలో శ్వేత కపోతాన్ని
పట్టించుకునే నాథుడేడి
అంతటా ప్రాణం కోసం జరుపుతున్న పోరాటమే
మనిషి తన మనుగడ కోసం
పడుతున్నాడు ఆరాటమే
మనసుతో మనుషులతో సూక్ష్మ జీవులతో
చేస్తున్నాడు యుద్ధమే
హింసలు ఉగ్రవాదాలు దురాక్రమణలు
అత్యాచారాలు మోసాలు మత మౌడ్యాలతో అధికార దాహాలతో క్రైమ్ సినిమాని తలపించే జగతి ఒక కృత్రిమ రంగుని పులుముకుని మౌనగీతాన్ని ఆలపిస్తోంది నేడు
ఇది మానవత్వం అనే సహజ రంగులతో ప్రభవిల్లుతూ మారిన మారుతున్న మనుషుల నైజాలు విశ్వశాంతికి ఆజ్యమై భావితరానికి ఆదర్శమై మెలగాలని ఆశిస్తూ ఖండ ఖండాలుగా అడ్డుగోడలను సృష్టించుకున్న ప్రపంచము ఆ అంతరాలను తుడుచివేసేదిశగా అడుగులు వేయాలని
మనస్ఫూర్తిగా కోరుకుంటూ అక్షరీకరించాను శాంతి కపోతానికి రెక్కల బలమై
(అంతర్జాతీయ శాంతి దినోత్సవం సందర్భంగా)
మంజుల సూర్య, హైదరాబాద్
1 comment
రోజురోజుకు సమాజంలో పెరుగుతున్న ఆరాసిగకాలకు, అక్రమాలకు అంతెక్కడో,సమసమాకస్థాపన ేేపుదు జరుగుతుందో అంతు లేని ప్రశ్నలుగ మిగిలిపోతున్నాయ్