బక్కచిక్కిన మనిషిలో మొక్కవోని
ఆత్మబలము చూడు
బోసినవ్వుల మాటున సమస్యల
సంఘర్షణ చూడు
ముడతలు పడిన చర్మము మాటున
లాఠీ దెబ్బల గాయాలు చూడు
సత్యం అహింసలు రెండు కళ్ళుగా
కళ్లజోడు వెనుక దాగిన వైనం చూడు
సాదా సీదా చేనేత వెనుక
జాతిని సంఘటితపరిచిన నేతను చూడు
ఊతమిచ్చిన ఊతకర్ర
సాయుధపరిచిన జీవకర్ర
నిష్ఠ కలిగిన నిరాడంబర జీవితం
అందరికీ ఆదర్శమైన తీరు చూడు
ఉప్పెనలాగా ఉద్యమించిన
ఉప్పు సత్యాగ్రహం ఉడుకు చూడు
మాతృభూమి దాస్య విముక్తికి
తడబడని అడుగుల నిబ్బరం చూడు
విశ్వమంతా పేరుగాంచిన
భారత జాతిపితను గర్వంగా చూడు
చూసి నేర్చుకో కొంత అయినా
అతని బాటలో నడిచి అయినా
మార్చుకో నిను మరి కొంత అయినా
మానవత్వాన్ని మంటగలపక
శాంతి పావురాన్ని ఎగురవేసేయ్
మహాత్ముని ఆశయాలు మళ్ళీ చిగురించేలా
చేసేయ్
సంస్కరించిన సమ సమాజాన్నే
సవినయంగా కానుకగా అర్పించేసేయ్
మంజుల సూర్య, హైదరాబాద్
