ఒంటిపై కొల్లాయి కట్టినా
చేతిలో ఊతకర్ర పట్టినా
ఉప్పు సత్యాగ్రహం చేపట్టినా
సహాయనిరాకరణ ఉద్యమం తలపెట్టినా
భరతావని స్వేచ్ఛా వాయువులు పీల్చాలనే
భారతీయులకు బానిసచెర వీడాలనే
సత్యాహింసలే ఆయుధాలుగా
ఆచరణే ఆచారంగా
విదేశీ వస్తువులు బహిష్కరించి
స్వాతంత్ర్య కాంక్షను అందరి మనసుల్లో రగిలించి
క్విట్ ఇండియా అనే నినాదాన్ని ఆవిష్కరించి
అహింసా వాదమే మేలనిపించి
స్వాతంత్ర్య పోరాటం నడిపించి
బ్రిటిష్ పాలకులనుంచి స్వాతంత్ర్యం సాధించి
భారత దేశాన్ని గెలిపించి
బోసినవ్వులు చిందిస్తూ
అందరికీ తాతవైనావు
తాతంటే ఎవరంటే..
మా గాంధీతాత అనిపించుకున్నావు
రాబోయే తరం పిల్లలు
నువ్వు ఎవరో తెలియదనకుండా
పచ్చనోటుపై నీ బొమ్మ వేసి
రాబోయే తరానికి నిన్ను గుర్తుండేలా చేస్తున్నారుకానీ
నీ గురించి నువ్వు పాటించిన విలువల గురించి నేర్పడం మరచిపోతున్నారు
గాంధీతాత అంటే కూడలిలో నిలబెట్టిన విగ్రహం అనేలా చేస్తున్నారు
ఓ గాంధీ నువ్ మళ్ళీ జన్మించు
మాయమవుతున్న మానవత్వాన్ని బతికించు
వలువలూడదీసుకున్న విలువలను విశ్వవ్యాప్తం చేయడానికి
పెట్రేగిపోతున్న హింసను
అదుపు చేయడానికి
మళ్ళీ జన్మ ఎత్తి రావయ్యా
ఓ మా గాంధీ తాతయ్యా..!!
దేవలపల్లి సునంద
