ఆర్తితో పిలిచినా రావేల
భక్తితో కొలిచినా ఉలకవేలా
ప్రాతః సంధ్యావేళలో
ప్రజ్వలించే దీపాల తోరణాలు
నీ కరుణా కటాక్ష వీక్షణానికై
స్వాగతాలే పలుకుతూ ఎదురుచూసే
అగరు పొగరు సువాసనాలతో
గృహమంతా వ్యాపించే
నీ నామ పారాయణలతో ఆరామమే
ప్రతిధ్వనించే
సంకీర్తనలతో నా మేను మైమరిచే
దానము స్నానాలతో
ఆత్మ పునీతమాయే
ఉపవాస దీక్షలతో తనువు
ఉత్తేజితమాయే
తులసీ కల్యాణంతో జన్మధన్యమాయే
ప్రార్థనలతో తదాత్మ్యం చెందినా కాని
మాసమంతా నీపైనే మనసు నిలిపిన కానీ
రావేల నీవు గంగాధరా
జోడుగా కదలిరా దామోదరా
నామమేదైతేనేమి దైవమొక్కటే
కొలిచే తీరు ఏదైతేమి భావమొక్కటే
ఫలితమాశించి చేయుటలేదు
ఫలములిస్తావని పూజించుటలేదు
అనుగ్రహమే చాలు ధన్యమవుటకు
అభయమిస్తే చాలు ముందడుగు వేయుటకు
మంజుల సూర్య, హైదరాబాద్