కాలం ఒక మహేంద్రజాలం
నిరంతర కాల చక్రభ్రమణానికి
అడ్డుకట్ట వేయడం అనివార్యం
కాలం క్షణక్షణం చేజారి పోతూ
మదిని దోచే మధురస్మృతులను
మనోవేదన కలిగించే జ్ఞాపకాలను
తన ఆనవాళ్లుగా సంతకం చేసి
చరిత్ర పుటల్లోకి చేరిపోతుంది
ఎన్నోఆశలు ఎన్నెన్నో ఆశయాలతో
ఆహ్వానించిన గడిచిన వత్సరం
కరోనా ఆగమనంతో కలవర పరచి
అనూహ్య పరిణామాలకు ఆలవాలమై
చరిత్రలో చేదు ముద్ర వేసింది
మానవ తప్పిదాలను అవగతం చేసి
అనుభవసారంతో గుణపాఠాలను నేర్పింది
గతానుభవాల దొంతరలో
రాలిన ఆశయాలకు జీవం పోసి
వేదనకొమ్మల్లో ఆశలసుమాలు విరియాలంటే
భవిష్యత్తుకు బాటలు సుగమం చేసి
ఆకాంక్షల విహంగానికి చేతన రెక్కలు తొడగాలి
తరిగిపోతున్న మానవవిలువలను
సంకుచిత స్వార్థ భావాలను
మది తలపులలో నిక్షిప్తమైన
మనో మాలిన్యాలను తరిమి
వెలుగు గవాక్షాలను తెరిస్తేనే
స్వచ్చతా కిరణాలు హృదినావరిస్తాయి
మమతానురాగాల ఆలింగనంతో
జీవితం సంతోషసౌరభాలతో గుభాళిస్తుంది
సరికొత్త ఆశలను చిగురింప చేస్తూ
నవ్య భావాలకు నాంది పలికితేనే
ధరణి పచ్చని కాంతులతో విలసిల్లుతుంది
-పులి జమున, మహబూబ్ నగర్, 8500169682