ఎన్నో వత్సరాల పరాధీనత
ఎందరో త్యాగధనుల కలబోత
మరెందరో సమరయోధుల పోరాట తత్పరత
నేడు మనం అనుభవిస్తున్న ఈ స్వతంత్రత
రక్తధారలు స్రవించినా ఆగలేదు పయనం
కారాగారంలో కరిగినా చెదరలేదు సంకల్పం
కాల్పులకు కార్పణ్యాలకు ఎదురెళ్లిన ధీరోదాత్తం
నేటి తరానికి భావితరానికి అది కదా ఆదర్శం
గుర్తుచేసుకుందాం జెండాను నిండుగా చూసుకుని
గుండెలనిండా సదా దేశభక్తిని నింపుకుని
గుడినే చేసేద్దాం ఆ త్యాగధనులను మనసులో నిలుపుకుని
గుర్తెరిగి మసలుకుందాం
ఉద్యమలక్ష్యాలే ఊపిరిగా చేసుకుని
ఎగురేద్దాం జెండాను ఎక్కుపెట్టిన విల్లులా
ఎల్లలులేని ఖ్యాతికి ప్రతీకలా
ఆలపిద్దాం వందేమాతర గీతాన్ని సస్యశ్యామల భారతాన్ని అభివర్ణించేట్లుగా
నినదిద్దాం జయ జయ నాదాలను
విశ్వమంతా ప్రతిధ్వనించేట్లుగా…
గణతంత్ర దినోత్సవ శుభాకాంక్షలతో
మంజుల సూర్య, హైదరాబాద్