కాలచక్రం
ఎవరివైపు మొగ్గు చూపదని తెలిసినా
ఋతువు ముసుగు ధరించిన ప్రకృతిలో
తొలకరి కోసం
ఆశగా ఎదురుచూస్తున్న రైతన్న
చిటపట మంటూ
తొలకరి చినుకులు పలకరించగానే
పరవశించి రెప్పల పరదాల నుండి జారే
కన్నీటి చినుకుతో తడిసి ముద్దయ్యాడు
మట్టి పరిమళాన్ని వెదజల్లుతూ…
టపటప మంటూ
నీలిమేఘాలలో నుంచి రాలిన
చినుకుపువ్వులు చిన్నపిల్లలను
తొలకరి చినుకులై పలకరిస్తే
పులకరించి కాగితపు పడవల
నావికులయ్యారు వాళ్లు
చినుకు చినుకు అల్లుకొని
నీటితివాచీలను చినుకు దారాలతో
కుట్టి … పచ్చపచ్చని తివాచీపై
పచ్చలు పొదిగిన పరుపులా
నీటి ముత్యాలు మెరిసాయి
తొలకరి చినుకు రాకతో
వానధారలు పిల్ల కాలువలై
బాల్య దేహాలన్ని తామరాకులా
ఈత కొలనులలో తారాడుతున్నారు
తొలకరి జల్లుతో … తొలకరి చినుకుతో
తడిసి ముద్దవుతూ…!ముద్దవుతూ…!!
డా. చింతపల్లి ఉదయ జానకి లక్ష్మి, ఒంగోలు, Ph: 9440731068.
