అమ్మతల్లి

ముగ్గురమ్మల మూలపుటమ్మ

మంకాళమ్మా   వందనం

దుష్టశిక్షణ శిష్టరక్షణ జేయు

చండిచాముండీ వందనం

కరోనా మహమ్మారిని తరుము 

మా తల్లీ మంకాళమ్మా

అంగరంగ   వైభవోపేతంగా

బోనాలపండుగ జరగాలి

పాడిపంటల్లోన శోభిల్లుతల్లీ

ఆరగింపు ఆషాఢబోనం

ఆషాఢమేఘాల తొలకరి జల్లు

నీ వాకిట సానుపు వేయగా

అరుణారుణ పిడసలేసి నింగి

సుక్కలు రంగవల్లులు దీర్చ

తెలంగాణతల్లి గజ్జెగట్టి బోన   

మెత్తి నీ ముంగిట నిలవగా

వేదమంత్ర ఘోషతో ఘటమెత్తి

పూజారి ఘల్లున అడుగేయగ

డప్పుడోళ్ల చప్పుళ్ళు,పొట్టేళ్ల

ఉరుకులూపోరగాళ్లపరుగుతో

ఆడబిడ్డలంతా అమ్మతల్లి       

రూపమై  బోనమెత్తి కదలగా

పోతరాజు  వీరంగం, శివసత్తుల

పూనకం  శివా నీకు సంబరం

పసుప గుంకాలు, పూలుపండ్ల

నిమ్మ దండలు నీకలంకారాలు

జోడుబోనాలు, కల్లుసాకలు

తొట్టెలు నీకు  పిల్లలు మాకు

ధూపదీపారాధనతో సింహ

వాహినిగా వెలిగసిన రూపం

రంగంలోమాతంగై భవిష్యవాణి

బహిరంగ పరచే లోక జనని

భక్తుల మొరనాలించి శాంతించి

శివశక్తి చిరునవ్వు చిందించగ

అంబరాన్నంటిన సంబరంలో

సబ్బండవర్ణాల  ఆనంద హేల

జానపదవిన్యాసాలు తెలగాణ

సంస్కృతికి ప్రతిబింబాలు

అమ్మతల్లి బోనాలు మనజాతి

వారసత్వపు ఆధ్యాత్మిక సౌరభాలు

జై మహంకాళి జైజై మహంకాళి

డా.నమిలకొండ సునీత, కామారెడ్డి, 9908468171