బోనాల జాతరొచ్చింది
లష్కర్ బోనాల జాతరొచ్చింది
సెల్లి చంద్రమ్మ బోనమెత్తింది
సల్లంగ సూడమ్మ
జగజ్జనని ఉజ్జయిని
సింహవాహిని
లాల్ దర్వాజ
సికిందరాబాద్ ల కొలువైన
మాతల్లి
సల్లంగా సూడమ్మ పెద్దమ్మ
ఆషాఢ మాసాన నీ కోసమే
కొత్త కుండలో బోనమొండింది
పాలు బెల్లమన్నం
నైవేద్య మర్పింప
సెల్లి చంద్రమ్మ బోనమెత్తింది
దయ చూపి రోగాలు బాపి
కరుణించి దీవించు
మా యమ్మ
వానల్లు కురిపించి పంటలు పండించి
ధాన్యలక్ష్మివై కొలువుండమని
సెల్లి చంద్రమ్మ బోనమెత్తింది
కాళివైనా మహంకాళివైనా
మావూరి దేవత నీవమ్మా
యెల్లమ్మ మైసమ్మ నీవేనమ్మా
పోచమ్మ పెద్దమ్మ నీ
రూపమని
సెల్లి చంద్రమ్మ బోనమెత్తింది
అమ్మకి బొనమివ్వంగ
పోతురాజు వీరంగ నాట్యాలు
కొరడా దెబ్బలకై
పాకులాడు ప్రభంజనం
లాల్ దర్వాజ గల్లీ గల్లీ
మాతోత్సవ సంబురాలు
సెల్లి చంద్రమ్మ బోనమెత్తింది
ఊరి పీడ విరగ
భవిష్యవాణి రంగం
విశ్వమానవ మనుగడకు
అంబ పలుకు జగదంబ పలుకుమని
సెల్లి చంద్రమ్మ బోనమెత్తింది
కె.హరనాథ్, 9703542598