దివ్య దీపావళి

నింగిలోని తారలన్నీ నేలకు దిగి వచ్చిన వేళ
కార్తీక మాసాన కమనీయ కాంతుల హేళ
కేదారీశ్వర సత్యనారాయణ వ్రతాచరణతో
హరిహరులను ఆరాదించే కార్తీక మాసం

చెడుపై విజయం తథ్యమని తెలుపుతూ
కష్టసుఖాలకు కలిమి లేములకు ప్రతీకయై
చీకటి వెలుగులతో జీవన సందేశమిస్తూ
సంతోష సౌరభాలను వెదజల్లే దీపావళి పర్వం

దీపపు జ్యోతి వరదాయినియై
అజ్ఞాన తమస్సును తరిమి వేసి
చైతన్య దీప్తులతో జ్ఞానప్రాప్తిని ప్రసాదిస్తూ
జగతిని ధవళ కాంతులతో జాగృతం చేస్తుంది

కలువలరేడు కౌముది సుధలు కురిపించగా
చల్లని వెన్నెల కిరణాలు హృదిని తాకి
మది వాకిటిలో మధుర భావ పరిమళమై
లోగిళ్ళలో ఆనందాల హరివిల్లై విరిసింది

ధరణి నిండా నిండిన శరత్ చంద్రికా తళుకులతో
అవని అధ్బతమైన అందాలతో శోభిల్లగా
ముంగిళ్ళలో జిలుగువెలుగుల దీపతోరణాలతో
ఆబాలగోపాలాన్ని హర్షాతిరేకంతో అలరించేపర్వం

పులి జమున మహబూబ్ నగర్ 8500169682.