ఆ వెలుగులకే నా ప్రస్థానం

వెలుగుల వేల్పు వీడ్కోలు చెప్పాడో లేదో
వీధులంతటా సరికొత్త వెలుగుల కళ
ఇంటింటా దివ్వెల దివ్య హాసాలు
ప్రజ్వలించే ప్రమిదల ప్రకాశాలు
కొవ్వొత్తుల మిసిమి కాంతులు
విద్యుత్ వెలుగుల విలాసాలు
రంగుల బల్బుల దాగుడుమూతలు
ఇంతటి వెలుగుల అందాలకు
నా కళ్ల వాకిళ్లు ఆనందాల లోగిళ్లయిన వేళ
ఎదురుగా నిలిచాడు ఓ కళ్లులేని కబోది
వెలుగులను కనలేని అతడిని చూసి
నాదెంత అదృష్టం..అంతరంగ భావన!
కానీ మరు క్షణమే..
బాహ్య కాంతులకు అంతగా మురవకు
స్వార్థం, అసూయ, కపటం, కుటిలం
ఎన్నెన్నో చిమ్మ చీకట్ల గుయ్యారం నీ హృదయం
అతడి అంతః చక్షువుల వెలుగుల ముందు
కళ్లుండీ కబోదివే నీవు
మదిలో దీపం వెలిగించు
మనిషై నువ్వు భాసించు
మేల్కొల్పిన అంతర్వాణి
ఆ వెలుగులకే నా ప్రస్థానం!!

జె.శ్యామల