పల్లవి: తెలుగే వెన్నెల వెలుగు
తెలుగే వేకువ పులుగు
తెలుగు పలుకులే పలుకు …మన ll తెలుగు ll
తెలుగు భాష తో ఎదుగు llతెలుగే ll
1చరణం:
అమ్మ మోము నుండి జారే
అమృత గుళిక తెలుగు
అమ్మ గోరు ముద్దల లోని
కమ్మదనం తెలుగు
అమ్మ ఒడి ఆటే తెలుగు
అమ్మ నోటి పాటే తెలుగు
నేర్వకనే నేర్పులు నేర్పే నెచ్చెలి మన తెలుగు….llతెలుగే ll
2 చరణం:
రాజభాషలో విజయఘోషలో
రంజిల్లిందీ తెలుగు
పాదపూజలూ పల్లకి సేవలు
అందుకున్నదీ తెలుగు
పోతన్న నాదం తెలుగు
వేమన్న వేదం తెలుగు
తరతరాల ఈ జాతి చరిత్రకు
అద్దం మన తెలుగు…ll తెలుగే ll
3చరణం:
జానపదుల గానం లోని
జాజిమల్లె తెలుగు
కళారూపకాల్లో దొరికే
కమ్మతేనె తెలుగు
శృంగార దీపం తెలుగు
అంగార రూపం తెలుగు
ఉప్పెనలైన ఉద్యమాలకు
ఊపిరి మన తెలుగు…ll తెలుగే ll
దోరవేటి