అమృత తుల్యమైన ఆదిస్వరం అమ్మ
హృదయపులోతుల్లోనుండి
పలికే ఓంకారనాదం
వెన్ను విరిగే పురిటినొప్పులను
పంటికింద అదిమిపెట్టి
మరోజీవికి ప్రాణం పోస్తుంది అమ్మ
మనం ప్రపంచంలోకి వచ్చింది మొదలు
మనమే తానై మన శ్వాసే తన ప్రాణమై
బతుకుతుంది
తన పొత్తిళ్ళను తల్పంగా చేసి
అనురాగాన్ని పంచుతుంది
గారాలచిన్నారి మారాం చేసినప్పుడు
బుజ్జగించి తన నవ్వునూ ఏడుపు నూ
సమన్వయం చేస్తుంది
జోలపాటతో గానకోకిల అవుతుంది
నడతలో తప్పటడుగులు పడకుండా
అనునిత్యం కాచుకుని ఉంటుంది
తనుఅక్కడే ఉన్నా తన బిడ్డను
ఉన్నతంగా నిలబెడుతుంది
తర్జుమా చేయలేని ప్రేమను పంచుతుంది
తను కట్టై కాలేంతవరకూ
నింగీనేలకుమధ్య నిలువెత్తు
అమృత భాండమై
మనకు అండగా ఉంటుంది
జయంతి వాసరచెట్ల, హైదరాబాద్, 9985525355