జీవితంలోని చీకట్లను
పారద్రోలే భోగి మంటలతో
ధరణిపై స్వర్గలోకపు హరివిల్లులా
తరుణీ మణుల రంగవల్లికలతో
గంగిరెద్దుల విన్యాసాలతో
హరిదాసుల కీర్తనలతో
చెంచుదొరల పాటలతో
గిరిజన మహిళల నృత్యాలతో
రంగురంగుల పూల గొబ్బెమ్మలతో
భోగ భాగ్యాలనిచ్చే
భోగి లక్ష్మికి స్వాగతం
నువ్వుల పిండి స్నానాలతో
కొత్త వస్త్రాల అలంకరణలతో
లేత మావిళ్ళ తోరణాలతో
నోరూరించే పిండి వంటకాలతో
కొత్త అల్లుళ్ళ అలకలతో
బావా మరదళ్ల సరదాలతో
వినువీధిలో పతంగుల విహారాలతో
గోటీబిల్లలు,చెడుగుడు ఆటలతో
గొర్రెపోటేళ్లు, కోళ్ల పందెములతో
హుషారైన హృదయాలతో
సంక్రాంతి లక్ష్మికి స్వాగతం.
అన్నదాతల ఇంట
కొత్త ధాన్యపు రాసులతో
సిరి సంపదల భోగ భాగ్యాలతో
సంతోషాన్ని అందించే పశువులకు పసుపు కుంకుమల పూజలతో
బీదసాదలకు దానధర్మాలతో
ముత్తైదువల ఆటపాటలతో
కనువిందు చేసే
కనుమ లక్ష్మికి స్వాగతం.
వేదార్థం మధుసూదన శర్మ, కొల్లాపూర్, 9063887585