ఈ నడక ఏం చెబుతుందిపుడు…!
మాడిన ఆకలికేకల ఆర్తనాదాలను
మెడలో వేసుకుని సంచరిస్తూ
దాహార్తి తీర్చుకొనేందుకు
రోడ్డు పొడవునా నగ్నాకలితో
పరుగులు తీస్తున్న వలసపక్షులు
నవభారతపు పనిసూర్యుళ్ళు
ఈ దృశ్యం దేనికి సంకేతమిపుడు…!
కూలికోసం కోటితిప్పలు పడుతూ
కన్నీటి రెప్పలమాటున దాగిన
ఉప్పొంగే అనంతమైన దుఃఖాన్ని
ఊపిరిలోనే అదుముకుంటూ
బతుకును శ్వాసిస్తూ బయలుదేరిన
బతుకుజీవి ఆక్రందనల ఆపసోపాలు
ఈ చిత్రం దేనిని ఆవిష్కరిస్తుందిపుడు…!
ఆకలిగొన్న నవభారతాన్ని
నడివీధిలో నగ్నంగా చూపిస్తూ
మసకబారిన జీవితాలతో
నడి ఎండవేడిమిలో నడక సాగిస్తూ
తడారిపోయిన గొంతుకలతో
సెమటసుక్కల ప్రయాణగీతిక
ఈ గోస ఏం చెబుతుందిపుడు…!
మహమ్మారి కరోనా కాటుకు
పనిలేక సొంతూళ్ళకు పోతూ
దారిపొడవునా మరీచికలే దర్శనమిస్తున్నా
తప్పలేని జీవనగమనంలో తిప్పలెన్నో పడుతూ
సొంతగూళ్ళకు చేరుకున్న అభాగ్యులు
దిక్కుమొక్కూలేని దీన బతుకులు
– డాక్టర్ భీంపల్లి శ్రీకాంత్, పాలమూరు, 9032844017
