ఎదురయ్యే ఆశల్లో ముగ్గులు తోరణాలు
పొలాల కడుపులు నింపే పంటల పారిజాతాలు
గుమ్మం నుండి గుమ్మం దాకా ఆనందం
ఒక పండగ దృశ్య పరంపర, పలుకు నుండి ఫలం వరకు..
సమస్తం ద్విగుణీకృతం చేసే ఋతు ఆవిష్కరణతో
ఎండిన నది అయినా జలపాతాల తరంగంలా మారి
ఆత్మీయతల్ని ఆర్థ్రత చేసే ప్రతి క్షణానికి ఆహ్వానం..
అనుబంధాల అవని గుండెల్లో ప్రాణ శక్తి వెలుగులు..
ఈ సమయం ఆహ్వానంలా ఎదురు వస్తోంది
భోగి మంటల వాద్య బృందమవుతుంది
మకర సంక్రాంతి పూలతో, పండ్లతో హృదయ రూపాల్ని తలపిస్తుంది
కనుమ ఒక తరం నుండి మరో తరానికి మనిషి కథను ప్రస్తావిస్తుంది
వాస్తవాల్ని మరచిపోతే జీవిత గమనం లేదు
అనుభూతుల్ని వదిలేస్తే మనోవిష్కరణకు తావు ఉండదు
పండగల సంబరాల మధ్య మనిషి మనోగతం
కాలం జాడల్లో అవసరాలతో
అవి తీరే ఆలోచనలతో జీవనం సాక్షీభూతం!
మానవాళికి నిత్య యశస్తోరణం.
శైలజామిత్ర, హైదరాబాద్