అమృతం కన్నా మధురం

అమృతం ఎలా ఉంటుందో తెలియదు కానీ
అమ్మ భాష కంటే మధురం అనుకోను
అమ్మ కడుపులో నేనున్నప్పుడు
అమ్మ కమ్మనైన తెలుగు నే విన్నాను
నన్ను కనే కష్టంలో అమ్మ
‘ అమ్మా ‘ అంటే
వెలుగు చూస్తూ భయంతో నేను కేరుమన్నా
కన్నా, బుజ్జి ..అమ్మ పిలుపులతో పులకించా
అమ్మ లాలి పాటతో పవ్వళించా హాయిగా
నా తొలి తెలుగు పలుకులు అత్త..తాత
ఆపైన అమ్మ, లాల, బిక్కి, ఆము..ఎన్నెన్నో
నా ముద్దు ముద్దు తెలుగు అందరికీ విందే
మళ్లీ మళ్లీ నా మాటలు వింటూ అంతా వినోదాలే
పలక పట్టి అ, ఆ, ఇ, ఈ ..అచ్చులు దిద్దా
క, ఖ, గ, ఘ..అంటూ హల్లులు గట్టిగా నేర్చా
అమ్మ , అమ్మమ్మ చెప్పిన కథలు
నాన్న కమ్మని కబుర్లు, తాత పాడిన పద్యాలు
బడిలో మాస్టారు చెప్పిన మంచి మంచి పాఠాలు
అన్నీ ,అన్నీ అచ్చమైన అమ్మ భాషలోనే
ఆడినా, పాడినా, నవ్వినా, ఏడ్చినా తెలుగే
తెలుగు భాష తోడుతోనే నేటిదాకా ఎదిగా
ఎన్ని భాషలు నేర్చినా ఎనలేని భాష తెలుగే
తెలుగు వెలుగులోనే కడదాకా నా పయనం!

(అంతర్జాతీయ మాతృభాషా దినోత్సవం సందర్భంగా)

జె.శ్యామల