‘శోభా’ గమనం

కుహూ కుహూ! కుహూ కుహూ!!

కోకిలమ్మ  ‘ శోభో ‘దయం  చెప్పింది

అవును..ఇది ఉగాది ఉషోదయం

కొత్త ఆశలు చిగిర్చే నూతన వసంతోదయం

శుభకృత్ ఓ వత్సర కాలానికి

‘ శుభం ‘ పలుకగా

శోభకృత్ మరో వత్సరానికి శ్రీకారం చుట్టింది

శోభకృత్..అందంగా ఉంటుందని అందరి ఆశ

అందంగా అంటే ఆనందంగా అనే కదా

అదీ .. ఏ ఒక్కరి ఆనందమో కాదు

సర్వ మానవ సుఖసంతోషాలు

అది సిద్ధించాలంటే

నేను, నువ్వు, మీరు, మనం

అందమైన  అంతరంగాన్ని

సంతరింపజేసుకంటే

కుళ్లు, కుత్సితం, కుసంస్కారం

అవలక్షణాలను అంతం చేసి

సమత, మమత, మానవతలతో

వ్యక్తిత్వాన్ని రూపుదిద్దుకుంటే

‘శోభకృత్ ‘ కాదా సార్థకం?

ఇది నిజం..

మనతోనే అసలు సిసలైన

 ‘ శోభా’ గమనం !

 రారండి అందరూ

 అటువంటి శోభకృత్ కు

 ఆలపిద్దాం ఆహ్వాన గీతం

జె.శ్యామల