బాల్యాన్ని తుడిచి, బాధ్యతల
బండిని ఇంకా ఎక్కకముందే
ఇంటిమాటలు కొర్రాయిలవుతాయి
అన్నాదమ్ములమధ్య ఈడుతేడాలనెన్నుతూనే
ఆడపిల్లగ లింగ నిర్ధారణ వ్రణాల్ని పుట్టిస్తారు.
బడి ఆవరణేమీ హృదయావరణ కాదు
లేతకొమ్మలకు అంటుగట్టి , లేనివన్నీ అంటగట్టి,
ఒకటేదో దుమారాన్ని రేపుతారు.
కళాశాల కళ దరిచేరగానే
వేట! వేట!మగకన్నుల వేట !
ప్రేమించానంటాడు,ప్రణయమూర్తినంటాడు.
పెళ్ళి మురిపెపుపువ్వై పూస్తుంది
చనువుమొత్తం కొత్తతీరం చేరేదాక
ఆగలేని దాంపత్య వాదనల గోదాముల వెనుక
చెప్పాల్సిన నిజాల్నిదాచేస్తుంటాడు
ఇది అది అని చెప్పలేనంత విచిత్ర మార్పును రహస్యంగా చేరవేస్తుంటాడు
దుఖః చిత్రాన్ని పగిలిన అద్దంలో చూపుతాడు.
ఊబి అనకున్నా, కారాగామనకున్నా , ఏకపక్ష నిర్ణయాల వివక్ష చాపక్రింద చేరేదాకా విదిలించలేని బంధనం నట్టింట్లో కూర్చుంటుంది.!
ఇదిగో -ఇట్లా మహిళాదినోత్సవాల ప్రతిబింబాన్ని కొత్త అద్దంలో చూసినప్పుడు
ఎక్కడలేని ఆనందం ,
చెప్పగరాని మనోధైర్యం ముందుకొస్తుంది
-డా।। కొండపల్లి నీహారిణి