అమ్మ పేగు తెంచుకుని
పుట్టిన మొదటి క్షణంతో
వాత్సల్య వీచికల
సౌరభాల్ని ఆశ్వాదించా పసికందునై
కాలమనే
కల్పవృక్షంలో
అల్లుకున్న లతనై
సంకల్పాలను తీర్చుకునే
బాల్యాన్ని సావాసాలతో
ఆటపాటలతో
చదువు సంధ్యలతో
ఆనందంగా అనుభవించా
ఆశలు పెంచుకుంటూ
యవ్వనాన్ని పరుచుకుంటూ
పొంగిన వయసుతో ఉరకలేస్తూ
అమాయకంగా లోకాన్ని చూస్తూ
వాన చినుకుల జలధారలు
భూమి తల్లి ఓడిలో ఇంకిపోయి
దప్పిక తీర్చుకున్న భూమి
పచ్చ చీర కట్టినట్టు
ఆకులతో యవ్వన చీర తొడిగా
నిరంతరం నిశ్చలమైన
నిర్మలమైన ఆలోచనలతో
పువ్వులు పూస్తూ
పరిమళాల సుగంధానికి
పరవశించిన తుమ్మెదకు
బందీ అయ్యా
ప్రేమ, మంచితనం అనే
తేనెలతో మాధుర్యాన్ని పంచుతూ
సంసారమనే ఇల్లును పెనవేసుకున్నా
చిన్న చిన్న ఆశలతో
చిగుళ్లు వేస్తూ
మొగ్గ తొడుగుతూ
చీకు చింతలతో
చిరు ఆనందాలతో గడిపేశా
నిరాశ నిస్పృహలు ఎదురైన క్షణంలో
ఆత్మీయ నేస్తం సాహచర్యంతో
భర్త బంధానికి చుట్టుకుపోయా
కష్టాల గాలివానలేన్నివచ్చినా
నష్టాల వడగళ్ళు ఎన్ని కురిసినా
కాలమనే కల్పవృక్షానికి
అల్లుకున్న లతనై
జీవితం సాగించా
ఆదర్శంగా జీవించే
అనుబంధాల పందిరినై
అనురాగాల వల్లినై
ఆత్మీయతల చిగురాకునై
విలువలతో అల్లినపూతోటనై
సంస్కారాల తోరణమై
సాంప్రదాయంతో అంటు కట్టబడి
సంస్కృతిని పంచే వనితనై
నలుగురికి మేలు చేస్తూ…
‘నేనొక లతనై’ అల్లుకుపోయా….!
‘నేనొక వనితనై’ నిలిచి పోయా….!!
నేనొక వనితనై’ నలిచి పోయా….!!!
(అందరికీ మహిళా దినోత్సవ శుభాకాంక్షలు)
డా. చింతపల్లి ఉదయ జానకి లక్ష్మి, వింగ్స్ ఇండియా పౌండేషన్ డైరెక్టర్, ఒంగోలు, Ph: 9440731068