వెన్నెలకు ధీటుగా తాను
వేకువ కిరణమై తాను
తారలా తళుకులీనుతూ తాను
ధరిత్రిలా ఓరిమితో తాను
పూల సుగంధం తాను
పూరేకుల పరిమళం తాను
సృష్టికి ప్రతిసృష్టి తాను
తన సృష్టిలో రక్షణ లేక తాను
కత్తిలా దూసుకుపోయేది తాను
కాళిలా కదనరంగంలో తాను
రాధలా అనురాగానికి ప్రతీక తాను
రోదసిలో తాను రోగులకు సేవ చేయుటలో తాను
ఉత్పాదనలో తాను సేవా రంగంలో తాను
రక్షణ తాను శిక్షణ తాను
అన్ని రంగాలను రంగరించి
ఔపోసన పట్టింది తాను
విలక్షణ మూర్తిమత్వము తాను
జ్ఞాన వికసిత విశారద తాను
అనుబంధాల మూలస్తంభం తాను
అవి లతలా పాకేందుకు దోహద పడేది తాను
రాని విద్యే లేని రాణి తాను
మహామహులనే మట్టికరిపించే మహారాణి తాను
అన్ని హంగులున్న పంచవన్నెల చిలకే తాను
కాని బోయవాడి చేతిలో గాయపడుతున్న కోయిలే తాను
బలవంతపు ఆహుతికి దగ్ధమవుతున్నదే తాను
బలి అవుతున్నా తొణకదు తాను బరిలోంచి తొలగదు
పరుగెడుతూనే ఉంటుంది
పోరాడుతూనే ఉంటుంది
తానేమిటో నిరూపిస్తూనే ఉంటుంది
(అంతర్జాతీయ మహిళా దినోత్సవం సందర్భంగా శుభాకాంక్షలతో)
మంజుల సూర్య , హైదరాబాద్
1 comment
బాగా రాసారు, అద్భుతంగా