ఆకలి కేకలు అప్పుల బాధలతో
చేజారి పోతున్న చేతివృత్తులతో
కన్నతల్లిలాంటి పల్లె తల్లిని
ఆత్మీయబంధాలను వదిలి
రెక్కల కష్టాన్ని నమ్ముకున్న
వలస కూలీల బతుకు పోరాటం
బండలు పగులగొట్టి బరువులు మోస్తూ
ఫ్యాక్టరీలో కార్మికులుగా మారి
అందమైన భవనాలను నిర్మిస్తూ
పొట్టకూటికై పుట్టెడు పనులను చేస్తూ
బతుకు భారాన్ని మోసే వలసజీవులు
దేశ ప్రగతి సౌధానికి వీరే పునాదులు
ప్రపంచాన్ని కలవరపెడుతూ
కరోనా రూపంలో కాలం కన్నెర్ర చేసి
కనీవినీ ఎరుగని కష్టాలతో
జీవితాలకు చిక్కుముడి వేసింది
ఆనందాలను ఆవిరి చేస్తూ
బతుకులలో నిప్పులు పోసింది
లాక్ డౌన్ తో పనులు కోల్పోయి
ఇంట్లో పస్తులతో గడప లేక
నిప్పులు చెరిగే ఎండలో
నిబ్బరమే ఆయుధంగా చేసుకుని
కన్న ఊరికి కాలినడకన
నరక యాతననుభవిస్తూ
అలుపెరుగని పోరాటం చేస్తున్నారు
నిప్పుల గుండమైన ఎండలో
కందిపోయి బొబ్బలెక్కిన పాదాలు
రుధిర పాద ముద్రికలై
రహదారులను చిత్రిస్తున్నాయి
నెత్తిన భుజాలపై భరింపలేని బరువులతో
పిల్లాపాపలతో సాగే పయనం
ఆకలిమంటను మించిన ఎండవేడి
అలసిసొలసిన వలస దేహాలలోని
శక్తినంతా ఆవిరిని చేస్తుండగా
గాలిలో దీపాల్లా రెపరెపలాడుతున్నారు
వలస జీవుల బతుకు చిత్రాలు
కంట కన్నీరొలికించే సజీవదృశ్యాలు
ఎంతో కాలంగా ప్రోది చేసుకున్న
మమతానురాగాలను పెనవేసుకోవాలని
గుండెను గుప్పెట్లో పెట్టుకుని
సడలని మనోనిగ్రహంతో సాగిపోతున్నారు
గమ్యం చేరాలనే వారి ఆరాటానికి ఊతమై
ఆదుకునే దిక్కుమొక్కు లేని వారికి
ఆపన్న హస్తాలమై అండగా వుండి
పల్లెతల్లి ఒడిని పదిలంగా చేర్చుదాం
మానవత్వ దీపాలను వెలిగించి
వలస బతుకులలో వెలుగులు నింపుదాం
పులి జమున, మహబూబ్ నగర్
