పాదాలు రోడ్డు సూర్యుని మీద
మునిగితేలుతుంటాయి
కాకి నోటిలో అరపు
అయిన సర్కారుకు
భయపడిన ప్రయాణాలు
అరణ్యాల ముసుగులోని
రహస్యపు
కొనసాగింపు లవుతాయి
భుజాల నుండి
జారిపడుతున్న
తన నెత్తుటి కూన
చూపుడు వ్రేలుకు వ్రేలాడే
వర్షంలో తడుస్తున్న
ఊరపిచ్చుక లాంటి
పసితండ్రి
గూడైనా గుట్టైనా
తన అడుగులో
అడుగైన సగం ప్రాణం
ఎవడు విడిచిన
నిట్టూర్పూ కదా అతను?
తన రెక్కల చెమట
బిందువులు ఎందరు
చీకటి మనుషులను
మహాదాతలను చేశాయో?
తన కంటి నదుల్లో
ఊపందుకుంటున్న
అధికార మూలాలు
ఎందరికి అహంకారపు
మత్తు మందై ప్రవహించాయో
ఒక అదృశ్య అల్ప జీవి
తన నిలా తరిమి కొట్టింది
ఈ వ్యవస్థ సాధించిన ఎంత
అరాజక రాజకీయం అతడు?
ఈ అన్నపూర్ణ
విదిలించిన అర్ధరాత్రి
చలి నెగడు అతడు
నాగరిక నటనలకు
ఇప్పుడొక సమాధానం
లేని ప్రశ్న అతడు
విరిగిన రోజుల ముక్కలలో
ఈ దేశం తల ఎత్తలేని
దుఖం మచ్చ అతడు?
డాక్టర్ కాంచనపల్లి గోరా, సెల్ నెం 9676096614