అంతా నీవల్లే
అంతటా నీ ఊహల్లే
అల్లుకుపోతుంటాయి అల్లికల్లే
అందమైన పద కవితల్లే
సందుదొరికితే వచ్చేస్తావ్ చాప కింద నీరల్లే
తిష్ఠ వేస్తావ్ సింహాసనమల్లే
మెత్తగా తాకుతావ్ మరుమల్లె పూవల్లే
మత్తుగా జోకొడతావ్ లాలిపాటల్లే
పరుగులెత్తిస్తావు చిరుతల్లే
అందిపుచ్చుకుంటే నిండిపోతావ్
పరిమళమల్లే
మమేకమైతే కరిగిపోతావ్ కర్పూరమల్లే అంతటా కప్పేస్తావ్ ఆకాశమల్లే
కొలువుంటావ్ గుండె గూటిలో గుడల్లే
చేరువుంటావ్ కనుపాపల్లో బొమ్మల్లే
వెన్నెలే కురిపిస్తావ్ చంద్రుడల్లే
వెల్లువే అవుతావ్ సాగరమల్లే
నిండిపోతావ్ అంతటా వెలుగల్లే
అణువణువు పాకుతావ్ కరెంటల్లే
ప్రాణాన్నే శాసిస్తావ్ శ్వాసల్లే
నేనే నీవవుతావ్ నీ ఆలోచనల్లే
నన్నే మరిపిస్తావ్ అద్భుతమల్లే
తనువంతా నలుగులా పసుపల్లె
మిగిలిపోతావ్ ఎప్పటికి
నుదుట సింధూరమల్లే
జత కడతావ్ తోడుగా ఏడడుగులల్లే
అంతా నీ వల్లే….
నీవు లేకుంటే జీవితం వల్లకాదల్లే..
అది వల్లకాడల్లే
మంజుల సూర్య, హైదరాబాద్
