మంచుబిందువు సూర్యుని వేడికి
ఆవిరైనట్లు
అనురాగాలు వేడిప్రకోపంలో
దగ్ధమవవుతాయా
ఒకవేళ అలా జరిగినా
గుండెనిండా వేళ్లూనుకున్న
పచ్చనిచెట్టులా ప్రేమ నిండిఉంటే
ప్రాణవాయువై మళ్ళీ పలకరించదా
కెరటాల హోరు జోరు ఎంత ఉన్నా
తీరాన్ని ముద్దిడాలంటే
పొగరు వగరు తగ్గించుకోవాల్సిందేగా
మేఘుడెంత దూరంలో ఉన్నా భూమిని
కనిపెట్టుకుని ఉంటాడుగా కంటికి రెప్పలాగా
గుండెనంతా కరిగించినట్లు
కురిపిస్తాడుగా వర్షంలాగా
ఒక్కటే అనే భావనలో
మనం అనే భావన వనంలా కొలువుదీరి ఉంటే
అహానికి అస్తిత్వమే ఉండదు కదా
ఎంతగా మనసు అర్థమయినా
రూపాంతరం చెందే వైరస్ గుర్తొచ్చినప్పుడల్లా
పరిశోధన తప్పదేమో
మనిషి ఆలోచనలు అంతరిక్షంవైపు సాగుతున్నా
మనసు అంతరంగం అర్థం కాకుంటే
గ్రహాలు కూడా ఉపద్రవాన్ని తెచ్చిపెట్టవా
అంకురం చాలుగా అల్లుకుపోవడానికి
గుండె గుబాళిస్తే చాలుగా అవ్యక్తమై
అది కళ్ళలో ప్రతిఫలిస్తే చాలుగా వ్యక్తమై
మంజుల సూర్య, హైదరాబాద్
