శార్వరీ నీకిక సెలవు మరి
మా మనసుల్లో కొలువై
మా జీవితాలకు వెలుగై
మధురానుభూతిని మిగులుస్తావనుకుంటే
ఉషస్సులో కూడా చీకటిని మిగిల్చిన ఘనకీర్తి నీది
నీ జ్ఞాపకపు పుటలను తరిచి చూస్తే
అన్నీ ఆకలి కేకలే అన్నార్తుల ఆక్రన్దనలే
మర్యాదరామన్నలా గడప దాటని రోజులే
ఊపిరే ఉరితాడులా మారుతుంటే
ప్రాణభిక్షకు నోచుకోని శిక్షను అనుభవిస్తూ
తనువు చాలించిన కాయాలే
ఇంత జరుగుతున్నానువ్వు మాత్రం నిర్లిప్తంగా ఉండిపోతివి
నీ కర్తవ్య నిర్వహణే ధ్యేయంగా సాగిపోతివి
మా చిరునవ్వులనే గల్లంతు చేస్తివి
చిరు వ్యాపారులకు
చిరునామాయే లేకుండా చేస్తివి
సాయం ఎలాగూ లేదు
సానుభూతికి కూడా నోచుకోని
అభాగ్యజీవులలా వదిలేస్తివి
నీ కఠినవైఖరి క్రమశిక్షణ నేర్పేదిగా కాక
పగ పట్టినట్లుగా ఉంది
మనిషి వింత పోకడలకు వైద్యం చెయ్యాలే కానీ విషాన్ని ఎక్కిస్తానంటే ఎలా
అందుకేనేమో ఈ వీడ్కోలు
ఒకింత ఆశాజనకమయ్యింది
మంజుల సూర్య, హైదరాబాద్
