సమాజ జీవన గమనంలో
సగటు మనిషి జీవితంలో
కనీవినీ ఎరుగని కలవరమేదో
మదిలో అలల్లా చెలరేగి
నిరాశాంధకారం అలముకుని
అల్లుకున్న ఆశలన్నీ చెల్లాచెదురైనాయి
చింతలన్నీ చెంతచేరి వంత పాడగా
ఆనందాలన్నీ ఆవిరవుతున్న వేళ
ప్రకృతి విన్నూత్న సొబగులనద్దుకుని
సప్తవర్ణ శోభితంగా అలరారుతూ
ప్లవ నామవత్సర ఆగమన తరుణమైనా
శృతి తప్పిన గమకములను సవరించి
చైతన్య రాగమాలపిస్తూ నవోన్మేష శోభతో
ఆమని పులకింతయై అందాలు చిందిస్తూ
ఎద నిండా సంతోష సౌరభాలు వెదజల్లాలి
హృదిలోని అమవస చీకట్లను తరిమివేస్తూ
తొలిపొద్దు వెలుగులకై వేచి చూడాలి
కొంగ్రొత్త ఆశలను ప్రోది చేసుకుంటూ
ప్రేమానుబంధాల పలకరింపులతో
ఆత్మీయానురాగాలను పంచుకోవాలి
ప్లవ నామ వత్సరమైనా శాంతిని కలిగించి
మనసున మమతల హరివిల్లై విరిసి
నవ జీవన కాంతితో కళకళలాడే
వెలుగురేకై పల్లవించి వెలుగులు పంచాలి
పచ్చటి చెట్లకు నెలవైన ప్లవనామ వత్సరమా
వెచ్చటి కన్నీటిని తుడవగా వడివడిగా రావమ్మా
చీకటి ముసిరిన బతుకులలో వెలుగుల వేదికలా
సరికొత్త ఆశలకు వారధిలా రావమ్మా వసంతలక్ష్మీ
పులి జమున, మహబూబ్ నగర్, 8500169682.