శార్వరి శాలువా కప్పుతుందనుకున్నాను
కొరోనాను కానుకిస్తుందనుకున్నామా
వచ్చేది ప్లవనామ సంవత్సరం
ప్రవచనమంత హాయిగా ఉంటుందని ఆశపడుతుంటే
వైరస్ బరువుతో ఉగాది ఊగిపోతూ కదిలిపోతోంది
అయినా వెన్నుపోట్లనే నిభాయించుకుంటున్నాం
ఆటుపోట్లో లెక్కనా
జీవితమంతా లెక్కలేసుకుంటూ
బతికేటోళ్ళం
మాయదారి వైరస్సు శిరస్సులను ఖండించే ఖడ్గంలా
ఎంతపని చేసింది
పండగలు పబ్బాలులేక
చుట్టాలు పక్కాలులేక
కలుగులో ఎలక జీవితమయిపోయింది బతుకని
బాధపడ్డామో లేదో
బాధే సౌఖ్యమనే భావన రానీయమన్న కవి వాక్కు గుర్తుకొచ్చి నవ్వుకున్నాను
క్షణభంగురమే జీవితం మర్చిపోకన్న సూక్ష్మకణం
నాలోకి నేను తొంగిచూసుకోమని హితబోధ చేసింది
ఆదాయం వ్యయం రాజ్యపూజ్యం అనే మాటలు ఆకర్షించటం మానేశాయి
కోకిల స్వరంతోనో
షడ్రుచుల పచ్చడితోనో నిన్ను సరిపెట్టుకుంటాను
‘ప్లవ’తో పవనాలు మారనప్పుడు
ఉగాది నువ్వు అతిథివే కానీ
ఆపద్బంధువువి కాదు
ఏమీ అనుకోకు
నీకు మనస్ఫూర్తిగా స్వాగతం పలకలేక
గతం గోడలపై చెరగని జ్ఞాపకాలను తడుముతున్నాను
సి.యస్.రాంబాబు