దేశంలోనే అత్యంత విషాదకర సంఘటనగా మిగిలిపోయిన మోర్బి వంతెన ప్రమాదంలో మానవ తప్పిదమే ఎక్కువగా కనిపిస్తున్నది. ఈ ఘటనలో 135 మంది మరణించారు. ఈ వంతెన అకస్మాత్తుగా కూలిపోయిందని అందరూ అనుకుంటున్నారు. కానీ అది తప్పుగా తేలింది. ఈ బాధాకరమైన ప్రమాదానికి రెండేళ్ల క్రితం నుంచే అనుమానాలు వ్యక్తం అవుతున్నా పట్టించుకున్న నాథుడు లేడు. అధికారులు నిద్రపోయారు. ఫలితంగా దేశంలోనే అత్యంత విషాదకర సంఘటన జరిగింది. వంతెన నిర్వహణ మరియు మరమ్మతులను చూసే ఒరేవా కంపెనీ నుండి జనవరి 2020 నాటి లేఖ బయటపడింది. మోర్బీ జిల్లా కలెక్టర్‌కు వారు ఒక లేఖ రాశారు. తాత్కాలిక మరమ్మతులు చేసి వంతెనను తెరుస్తాం అని చెప్పారు. ఈ లేఖ తర్వాత కూడా అధికారులు మౌనంగా ఉండడంతో ఇంత పెద్ద ప్రమాదం జరిగింది. జనవరి 2020 నాటి ఈ లేఖలో, వంతెన కాంట్రాక్ట్‌పై కంపెనీ మరియు జిల్లా యంత్రాంగానికి మధ్య విభేదాలు ఉన్నాయి. బ్రిడ్జి నిర్వహణ కోసం ఒరేవా గ్రూప్ శాశ్వత కాంట్రాక్టును కోరుతున్నట్లు లేఖలో చెప్పింది. తమకు శాశ్వత కాంట్రాక్టు లభించే వరకు వంతెనపై తాత్కాలిక మరమ్మతులు కొనసాగిస్తామని బృందం తెలిపింది. వంతెన మరమ్మత్తు కోసం ఒరేవా సంస్థ మెటీరియల్‌లను ఆర్డర్ చేయలేదు. పూర్తి స్థాయి కాంట్రాక్టు దొరికిన తర్వాతే పని పూర్తి చేస్తామని కూడా ఆ కంపెనీ చెప్పింది. ఇంత నిర్లక్ష్యం చేసినా జిల్లా యంత్రాంగం ఒరేవా గ్రూపునకు శాశ్వత టెండర్లు ఇచ్చింది. జనవరి 2020లో జారీ చేసిన ఈ లేఖ తర్వాత కూడా, వంతెన నిర్వహణ కోసం ఒరేవా గ్రూప్‌తో 15 సంవత్సరాల పాటు ఒప్పందం కుదుర్చుకుంది.
మార్చి 2022లో మోర్బీ మున్సిపల్ కార్పొరేషన్, అజంతా ఒరేవా కంపెనీ మధ్య ఒప్పందం కుదిరింది. ఈ ఒప్పందం 2037 వరకు చెల్లుబాటులో ఉంది. ఒరెవా గ్రూప్ కాంట్రాక్ట్ నిబంధనలను ఉల్లంఘించిందని మున్సిపల్ అధికారి సందీప్ సింగ్ తెలిపారు. మున్సిపాలిటీకి సమాచారం ఇవ్వకుండా ఐదు నెలల్లో వంతెనను ప్రారంభించారని తెలిపారు. బ్రిడ్జికి సంబంధించి తమ వైపు నుంచి ఎలాంటి ఫిట్ నెస్ సర్టిఫికెట్ కూడా ఇవ్వలేదని అంటున్నారు. మోర్బీ బ్రిడ్జి ప్రమాదంపై న్యాయ విచారణ జరిపించాలని కాంగ్రెస్ అధ్యక్షుడు మల్లికార్జున్ ఖర్గే డిమాండ్ చేశారు. మోర్బీ వంతెన ప్రమాదంలో 135 మంది మరణించినందుకు జవాబుదారీతనం ఉండాలని ఖర్గే ట్వీట్ చేశారు. మున్సిపాలిటీ, ఓర్వ సంస్థ, బాధ్యులైన అధికారులపై విచారణ జరిపించాలని ఆయన కోరారు. ఈ సందర్భంలో, సుప్రీంకోర్టు లేదా హైకోర్టు న్యాయమూర్తి నేతృత్వంలోని కాలపరిమితితో కూడిన న్యాయ విచారణ మాత్రమే కరెక్టని ఆయన అన్నారు.
