పశ్చిమ బెంగాల్‌లోని ముర్షిదాబాద్ జిల్లాలో వక్ఫ్ (సవరణ) చట్టానికి వ్యతిరేకంగా జరుగుతున్న నిరసనలకు సంబంధించిన హింసాత్మక ఘర్షణల తరువాత తండ్రీకొడుకులు సహా కనీసం ముగ్గురు వ్యక్తులు మరణించారని ఒక సీనియర్ అధికారి శనివారం తెలిపారు. ఆందోళన చెందుతున్న నిరసనకారులను శాంతింపజేసే ప్రయత్నంలో, ఈ చట్టాన్ని కేంద్రం రూపొందించిందని, తన ప్రభుత్వం కాదని ముఖ్యమంత్రి మమతా బెనర్జీ స్పష్టం చేశారు. చట్టాన్ని కేంద్ర ప్రభుత్వం రూపొందించింది.
కాబట్టి మీకు కావలసిన సమాధానం కేంద్ర ప్రభుత్వం నుండి తీసుకోవాలి అని బెనర్జీ Xలో ఒక పోస్ట్‌లో అన్నారు. “ఈ విషయంపై మేము మా వైఖరిని స్పష్టం చేసాము. ఈ చట్టానికి మేము మద్దతు ఇవ్వము. ఈ చట్టం మన రాష్ట్రంలో అమలు చేయబడదు. మరి ఈ అల్లర్లు దేని గురించి? అని ఆమె అడిగారు. ఇప్పటివరకు జరిగిన సంఘటనల్లో సంసేర్‌గంజ్ ప్రాంతంలో ఉన్న జాఫ్రాబాద్‌లోని వారి ఇంటి లోపల ఒక తండ్రి, కొడుకు కత్తిపోట్లకు గురై మరణించారు. కుటుంబ సభ్యులు చెప్పినదాని ప్రకారం, దుండగులు తమ ఇంటిని దోచుకుని, ఆపై ఇద్దరిపై దాడి చేసి పారిపోయారని అన్నారు.
శుక్రవారం సుతిలోని సజుర్ మోర్ వద్ద జరిగిన ఘర్షణల్లో 21 ఏళ్ల వ్యక్తి బుల్లెట్ గాయాలతో మరణించాడని అధికారి తెలిపారు. శనివారం కూడా కొన్ని ప్రాంతాల్లో హింస కొనసాగింది. సంసెర్‌గంజ్‌లోని ధులియన్‌లో పనికి వెళ్తుండగా ఒక మైనర్ బాలుడు సహా ఇద్దరు బీడీ ఫ్యాక్టరీ కార్మికులకు బుల్లెట్ గాయాలు అయ్యాయి. ఇద్దరూ ముర్షిదాబాద్ మెడికల్ కాలేజీలో చికిత్స పొందుతున్నారు. అడిషనల్ డైరెక్టర్ జనరల్ (లా అండ్ ఆర్డర్) జావేద్ షమీమ్ కోల్‌కతాలో విలేకరులతో మాట్లాడుతూ, ఇప్పటివరకు అల్లర్లకు సంబంధించి మొత్తం 118 మందిని అరెస్టు చేసినట్లు చెప్పారు.
ముర్షిదాబాద్‌లో హింసను నియంత్రించడానికి పోలీసులు నాలుగు రౌండ్లు కాల్పులు జరిపారు. ఇద్దరు వ్యక్తులు గాయపడ్డారు. కేంద్ర ప్రభుత్వం తీసుకొచ్చిన వక్ఫ్ (సవరణ) చట్టంపై చెలరేగిన హింసాకాండతో భారీ అంతరాయాలు ఏర్పడ్డాయి. నిరసనకారులు పోలీసు వాహనాలను తగలబెట్టారు, రోడ్లను దిగ్బంధించారు. రైల్వే ఆస్తులను ధ్వంసం చేశారు. తూర్పు రైల్వేలోని న్యూ ఫరక్కా-అజిమ్‌గంజ్ విభాగంలో శుక్రవారం ధులియాండంగా మరియు నిమ్టిటా స్టేషన్ల మధ్య దాదాపు ఆరు గంటల పాటు రైలు సేవలు నిలిచిపోయాయి.
ముర్షిదాబాద్‌లోని అనేక ప్రాంతాల్లో నిషేధాజ్ఞలు విధించారు. మరింత తీవ్రతరం కాకుండా నిరోధించడానికి ఇంటర్నెట్ సేవలను నిలిపివేశారు. హింసలో పాల్గొన్న వారిపై కఠిన చర్యలు తీసుకుంటామని డిజిపి రాజీవ్ కుమార్ హెచ్చరించారు. శాంతి కోసం విజ్ఞప్తి చేస్తూ, అన్ని వర్గాల ప్రజలు రెచ్చగొట్టే చర్యలకు పాల్పడవద్దని సిఎం బెనర్జీ కోరారు. నిరసనల సమయంలో రైల్వే ఆస్తుల ధ్వంసంపై జాతీయ దర్యాప్తు సంస్థ (NIA) దర్యాప్తు చేయాలని డిమాండ్ చేస్తూ బిజెపి నాయకుడు సువేందు అధికారి రైల్వే మంత్రి అశ్విని వైష్ణవ్ కు లేఖ రాశారు.
