భారీ వర్షాల మధ్య మంగళవారం సాయంత్రం ముంబైలో ఘోర ప్రమాదం తృటిలో తప్పింది. రెండు మోనోరైల్ రైళ్లు స్టేషన్ల మధ్య ఎత్తైన ట్రాక్‌లపై ఆగిపోవడంతో వందలాది మంది ప్రయాణీకులు ప్రాణాలు అరచేతిలో పెట్టుకుని బతికారు. నాలుగు గంటల పాటు సాగిన రక్షణ చర్యల తర్వాత పరిస్థితి నియంత్రణలోకి వచ్చిందని అధికారులు తెలిపారు. 500 మందికి పైగా ప్రయాణికులను అధికారులు రక్షించారు.
మైసూర్ కాలనీ మరియు భక్తి పార్క్ మధ్య ఒక మోనోరైల్ రైలు ఆగిపోవడంతో దానిలో ఉన్న 400 మందికి పైగా ప్రయాణికులను క్రేన్ల సహాయంతో రక్షించారు. మరో మోనోరైల్ రైలు వడాలా స్టేషన్‌ వరకు లాగి తీసుకెళ్లి అందులోని 100 మందికి పైగా ప్రయాణికులను సురక్షితంగా దింపారు.
ఫైర్ బ్రిగేడ్ స్నార్కెల్ క్రేన్లను ఉపయోగించి రక్షణ చర్యలు చేపట్టింది. భారీ వర్షాల కారణంగా లోకల్ ట్రైన్ సేవలు నిలిపివేయడంతో మోనోరైల్ రైళ్లలో సామర్థ్యానికి మించి ప్రయాణికులు ఎక్కారని అధికారులు చెప్పారు. “ఎవరూ భయపడవద్దు, అందరినీ సురక్షితంగా బయటకు తీస్తాం. ఈ ఘటనపై దర్యాప్తు జరుగుతుంది,” అని మహారాష్ట్ర ముఖ్యమంత్రి దేవేంద్ర ఫడ్నవీస్ ఎక్స్‌లో పోస్ట్ చేశారు. “సాంకేతిక కారణాలతో ఒక మోనోరైల్ చెంబూర్ మరియు భక్తి పార్క్ మధ్య ఆగిపోయింది.
ఎంఎంఆర్డిఎ, ఫైర్ బ్రిగేడ్, మున్సిపల్ కార్పొరేషన్ సహా అన్ని సంస్థలు అక్కడికి చేరుకున్నాయి. ప్రయాణికుల భద్రతకే అత్యంత ప్రాధాన్యం ఇస్తున్నాం,” అని ఆయన తెలిపారు. సాయంత్రం 6.15 గంటల సమయంలో మైసూర్ కాలనీ మరియు భక్తి పార్క్ స్టేషన్ల మధ్య ఆగిపోయిన రైలులో భయాందోళన నెలకొంది. విద్యుత్ సరఫరా మరియు ఏసీ వ్యవస్థలు పనిచేయకపోవడంతో 15 మంది శ్వాస ఇబ్బందులు ఎదుర్కొన్నారు. వారిలో 14 మందిని అక్కడికక్కడే చికిత్స చేసిన తర్వాత డిశ్చార్జ్ చేశారు. ఒక చిన్నారిని ఆసుపత్రిలో చేర్పించగా, ఆమె పరిస్థితి స్థిరంగా ఉందని తెలిపారు.
రైలు సాయంత్రం 6.15 గంటలకు ఆగిపోయిందని, ఒక గంట తర్వాతే రక్షణ చర్యలు ప్రారంభమయ్యాయని ప్రయాణికులు అన్నారు. ఇది “చిన్న విద్యుత్ సరఫరా సమస్య” అని ముంబై మోనోరైల్ ప్రారంభంలో ఒక ప్రకటనలో తెలిపింది. “వర్షాల కారణంగా స్టేషన్ల వద్ద చాలా మంది ఇరుక్కుపోయారు. మోనోరైల్ సామర్థ్యానికి మించి ప్రజలు ఎక్కారు,” అని ఎంఎంఆర్డిఎ సంయుక్త కమిషనర్ ఆస్తిక్ కుమార్ పాండే చెప్పారు.
రక్షించబడిన ప్రయాణికుడు నరేంద్ర మిశ్రా మాట్లాడుతూ, మోనోరైల్ అధికారులు ఎక్కే ప్రయాణికుల సంఖ్యను నియంత్రించాల్సిందని అన్నారు. “నేను దాదాపు ఒక గంటా 45 నిమిషాలు మోనోరైల్‌లో ఇరుక్కుపోయాను. అధికారుల నుంచి ఎలాంటి సమాచారం రాకపోవడంతో ప్రజలు భయపడ్డారు. కొందరు శ్వాస తీసుకోవడంలో ఇబ్బంది పడ్డారు, కిటికీలు పగులగొట్టేందుకు ప్రయత్నించారు.
ఇద్దరు ప్రయాణికులు మూర్చపోయారు,” అని ఒకరు వివరించారు. మరో మహిళా ప్రయాణికురాలు మాట్లాడుతూ, “లోపల విద్యుత్ లేదు, ఏసీ కూడా పనిచేయలేదు” అని అన్నారు. “హార్బర్ లైన్‌లో లోకల్ సర్వీసులు భారీ వర్షాల కారణంగా నిలిపివేయడంతో మేము మోనోరైల్ ఎక్కాం, కానీ ఇలాంటి అనుభవాన్ని ఎదుర్కొన్నాం,” అని మరో ప్రయాణికుడు అన్నారు. గత రెండు రోజులుగా ముంబైలో కురుస్తున్న వర్షాలు నగరంలోని సాధారణ జీవనాన్ని దెబ్బతీశాయి.
