తమిళ సినీ నటుడు, టీవీకే పార్టీ అధినేత విజయ్ కి ఏ మాత్రం నాయకత్వ లక్షణం లేదని మద్రాసు హైకోర్టు వ్యాఖ్యానించిన నేపథ్యంలో రాబోయే తమిళనాడు అసెంబ్లీ ఎన్నికల్లో ఎంత ప్రభావం చూపగలడో అనే అంశంపై రాజకీయ వర్గాల్లో చర్చ చెలరేగింది. ఆయన అభిమానుల వలయం, సోషల్ మీడియా ప్రాచుర్యం, యువ ఓటర్లలో ఉన్న ఆదరణ ఇవన్నీ ఆయనకు రాజకీయ బలంగా మారతాయా లేదా అన్నది ప్రధాన ప్రశ్నగా మారింది. విజయ్‌కు రాష్ట్రవ్యాప్తంగా విస్తృతమైన అభిమాన వర్గం ఉంది.
ఈ అభిమాన సంఘాలు ఇప్పటికే సేవా కార్యక్రమాలు, సామాజిక కార్యకలాపాల్లో పాల్గొంటూ రాజకీయ కార్యకలాపాలకు సిద్ధమవుతున్నాయి. విశ్లేషకుల అభిప్రాయం ప్రకారం, DMK–AIADMK ఆధిపత్యానికి ప్రత్యామ్నాయంగా విజయ్ పార్టీ “తమిళగ విజయ్ కజగం” (TVK) ఎదగగలదని భావిస్తున్నారు. అయితే విజయ్‌కు ఎదురయ్యే సవాళ్లు కూడా తక్కువ కావు. నటుడిగా ఉన్న ప్రజాదరణను ఓట్లుగా మార్చడం అంత సులభం కాదని రాజకీయ నిపుణులు అంటున్నారు.
కమల్ హాసన్ కు కూడా ఇంతకు ముందు జనం గుంపులుగా వచ్చారు. అయితే అవి ఓట్లుగా మారలేదు. అదే విధంగా పార్టీ నిర్మాణం, నాయకత్వ బృందం, అభ్యర్థుల ఎంపిక వంటి అంశాలు విజయ్ రాజకీయ భవిష్యత్తును నిర్ణయించనున్నాయి. ఇటీవల కరూర్‌లో జరిగిన ర్యాలీలో జరిగిన తొక్కిసలాట ఘటన ఆయన ప్రచారానికి ప్రతికూల ప్రభావం చూపే అవకాశం ఉందని కూడా పరిశీలకులు సూచిస్తున్నారు.
తాజా విశ్లేషణల ప్రకారం, విజయ్ ప్రభావం రాబోయే ఎన్నికల్లో పెద్ద స్థాయిలో ఉండవచ్చని రాజకీయ వర్గాలు అంచనా వేస్తున్నాయి. అంటే, ఆయన పార్టీ కొన్ని ప్రాంతాల్లో ఓట్లను విభజించి ప్రధాన పార్టీలకు సవాల్ విసరగలదు. అయితే పూర్తిస్థాయి విజయం సాధించడం మాత్రం ప్రస్తుతం కష్టసాధ్యమని భావిస్తున్నారు. మొత్తానికి విజయ్ రాజకీయ ప్రస్థానం తమిళనాడులో కొత్త చర్చను తెరపైకి తెచ్చింది. ప్రజాదరణను ప్రజాభిమానంగా, ప్రజాభిమానాన్ని రాజకీయ విజయంగా మార్చగలరా అన్నది చూడాల్సి ఉంది.
