ఈ రోజు ఆంధ్రప్రదేశ్ పండుగ చేసుకుంటోంది. ఎందుకంటే, 15,941 మంది జ్ఞాన యోధులు మన సమాజంలోకి అడుగుపెడుతున్నారు. కేవలం 150 రోజుల్లో ఇంతమంది ఉపాధ్యాయులను ఎంపిక చేసి, ఒకే వేదికపై వారికి నియామక పత్రాలు అందజేయడం అనేది ఒక అద్భుతమైన యజ్ఞం. ఇది కేవలం ఉద్యోగాల పంపిణీ కాదు, తరతరాల జ్ఞాన వారసత్వాన్ని తిరిగి నిలబెట్టే ఒక మహోన్నతమైన ప్రక్రియ.
మన భారతీయ సంస్కృతిలో గురువును త్రిమూర్తులతో సమానంగా భావించారు. “గురుర్బ్రహ్మా గురుర్విష్ణుః గురుర్దేవో మహేశ్వరః” అని మన వేదాలు ఉద్ఘోషించాయి. గురువు లేనిదే విద్య లేదు, విద్య లేనిదే వెలుగు లేదు. చీకటిలో కొట్టుమిట్టాడే మన జీవితాలకు జ్ఞానమనే దీపాలను వెలిగించే దేవతలు వారే. గురువు కేవలం పాఠాలు చెప్పేవాడు కాదు, జీవిత సత్యాన్ని బోధించే మార్గదర్శి, మనలోని అజ్ఞానాన్ని, అహంకారాన్ని తొలగించే ఒక ఆధ్యాత్మిక శక్తి.
మన భారతదేశం ఒకప్పుడు “విశ్వ గురువు”గా వెలిగింది. నలంద, తక్షశిల వంటి విద్యాలయాలు ప్రపంచంలోని విద్యార్థులకు జ్ఞాన దేవాలయాలుగా ఉండేవి. నేడు టెక్నాలజీని శాసించేలా మన జీన్స్ లోని గణితం నుండి అన్నీ భోదిస్తున్నారు. ఆ పరంపరలోనే, ఈ రోజు అడుగుపెడుతున్న ప్రతి గురువు తనను తాను ఒక దేవాలయంగా, తాను నడిచే నేల ఒక పవిత్ర క్షేత్రంగా భావించాలి. వారి చేతుల్లో ఉన్నది కేవలం పెన్సిల్, పుస్తకాలు కాదు; భవిష్యత్ భారతదేశాన్ని నిర్మించే బలమైన పునాదులు. వారి చూపులో కరుణ, వారి మాటలో ఆశ, వారి గుండెలో అంకితభావం నిండి ఉంటుంది.
ఒక మంచి సమాజం ఎలా తయారవుతుంది? మంచి పౌరుల ద్వారా. మంచి పౌరులు ఎలా తయారవుతారు? మంచి గురువుల ద్వారా. వారు ఒకరి జీవితాన్ని మార్చడం లేదు, ఒక తరాన్ని తీర్చిదిద్దుతున్నారు. వారి బోధనలో శాస్త్రం, వారి ప్రవర్తనలో సంస్కారం, వారి చూపులో ఆత్మవిశ్వాసం ప్రతిబింబించాలి. ఎందుకంటే, వారిని చూసి విద్యార్థులు నేర్చుకుంటారు.
ఈ రోజు ఈ నియామక పత్రాలు అందుకుంటున్న ప్రతి గురువుకి ఒక పవిత్రమైన బాధ్యత ఉంది. సమాజాన్ని ఉన్నత శిఖరాలకు చేర్చడానికి మీరు తొలి మెట్లు. మీ సేవలు దేశానికి, ధర్మానికి ఎంతో అవసరం. భగవంతుని ఆశీస్సులతో, మీరు ఉత్తమమైన ఉపాధ్యాయులుగా, ఉత్తమమైన గురువులుగా, ఉత్తమమైన మార్గదర్శకులుగా ఎదగాలని మనసారా కోరుకుంటున్నా. మీ కృషి ఈ జాతి భవిష్యత్తుకు వెలుగునివ్వాలని ఆశిస్తున్నా. తొలి సంతకంతో పాలకులు పెట్టుకొన్న నమ్మకాన్ని నిలబెడతారని ఆశిస్తున్నా.
