అమెరికా అధ్యక్షుడు డొనాల్డ్ ట్రంప్ తీసుకుంటున్న కొన్ని వివాదాస్పద నిర్ణయాలకు వ్యతిరేకంగా న్యూయార్క్ నగరంలో నిరసనలు మిన్నంటాయి. ట్రంప్ వెంటనే తన పదవి నుంచి తప్పుకోవాలని డిమాండ్ చేస్తూ వేలాది మంది ప్రజలు వీధుల్లోకి వచ్చి భారీ ప్రదర్శనలు చేపట్టారు.
అమెరికా అధ్యక్షుడు డొనాల్డ్ ట్రంప్ పరిపాలనా విధానాలకు వ్యతిరేకంగా అమెరికా వ్యాప్తంగా ‘నో కింగ్స్’ (No Kings) పేరుతో భారీ ఎత్తున ఆందోళనలు కొనసాగుతున్నాయి. శనివారం ఒక్కరోజే న్యూయార్క్, వాషింగ్టన్ డి.సి, లాస్ ఏంజిల్స్ వంటి ప్రధాన నగరాలతో పాటు 3,300 పైగా ప్రాంతాల్లో నిరసనకారులు వీధుల్లోకి వచ్చారు. దాదాపు 80 లక్షల మందికి పైగా ఈ ప్రదర్శనల్లో పాల్గొన్నట్లు నివేదికలు చెబుతున్నాయి. రాయిటర్స్ నివేదిక ప్రకారం, ట్రంప్ తన రెండో విడత పదవీకాలం చేపట్టిన తర్వాత గత ఏడాది కాలంలో ఇలాంటి నిరసనలు జరగడం ఇది మూడవసారి.
న్యూయార్క్‌లోని టైమ్స్ స్క్వేర్, మన్‌హట్టన్ వీధులు నిరసనకారులతో నిండిపోయాయి. సుప్రసిద్ధ హాలీవుడ్ నటుడు రాబర్ట్ డి నీరో వంటి ప్రముఖులు ఈ ర్యాలీల్లో పాల్గొని ట్రంప్‌ను “ప్రజాస్వామ్యానికి ముప్పు” అని విమర్శించారు. ముఖ్యంగా ఇరాన్‌తో జరుగుతున్న యుద్ధం, కఠినమైన వలస విధానాలు (Immigration Policies) మరియు పెరుగుతున్న జీవన వ్యయానికి నిరసనగా ప్రజలు ఈ ఆందోళనలు చేపట్టారు. “ట్రంప్ వెంటనే పదవి నుంచి తప్పుకోవాలి”, “మాకు రాజులు వద్దు” వంటి నినాదాలు రాసి ఉన్న ప్లకార్డులతో ప్రదర్శనకారులు హోరెత్తించారు.
మిన్నెసోటాలో ఫెడరల్ ఏజెంట్ల కాల్పుల్లో ఇద్దరు పౌరులు మరణించడం కూడా ఈ నిరసనలు మరింత ఉధృతం కావడానికి కారణమైంది. అమెరికాతో పాటు లండన్, పారిస్, బెర్లిన్ వంటి అంతర్జాతీయ నగరాల్లో కూడా ట్రంప్ విధానాలకు వ్యతిరేకంగా ప్రదర్శనలు జరిగాయి. ఈ నిరసనల నేపథ్యంలో కొన్ని చోట్ల స్వల్ప ఉద్రిక్తతలు చోటుచేసుకున్నాయి, పోలీసులు పలువురిని అదుపులోకి తీసుకున్నారు. ప్రస్తుతం ట్రంప్ అప్రూవల్ రేటింగ్ 36 శాతానికి పడిపోయిందని రాయిటర్స్ పోల్ సర్వే వెల్లడించింది.
