అమెరికా అధ్యక్షుడు డోనాల్డ్ ట్రంప్ భార్య మెలానియా ట్రంప్ పై ఒక భారీ బడ్జెట్ తో డాక్యుమెంటరీ చిత్రాన్ని రూపొందించారు. “మెలానియా” అనే పేరుతో రూపొందిన ఈ చిత్రం జనవరి 30న ప్రపంచవ్యాప్తంగా విడుదల కానుంది. కొత్త చిత్రాన్ని ఫస్ట్ లేడీ మెలానియా ట్రంప్ శనివారం వైట్ హౌస్లో ప్రత్యేకంగా ప్రదర్శించనున్నారు. ఈ విషయాన్ని ఆమె సలహాదారు వెల్లడించారు.
శనివారం జరగనున్న ఈ ప్రత్యేక ప్రదర్శనలో అధ్యక్షుడు ట్రంప్, వారి కుటుంబ సభ్యులు, సన్నిహిత మిత్రులు తొలిసారిగా ఈ చిత్రాన్ని పూర్తిగా వీక్షించనున్నారు అని మెలానియా ట్రంప్ బాహ్య సలహాదారు, ఏజెంట్ అయిన మార్క్ బెక్మన్ తెలిపారు. ఈ సినిమా ఫస్ట్ లేడీకి సంబంధించిన అరుదైన తెరవెనుక దృశ్యాలను చూపించనుంది. ట్రంప్ రెండో పదవీకాలంలో మెలానియా పబ్లిక్గా తక్కువగా కనిపించిన నేపథ్యంలో, ఈ చిత్రం ఆమె పాత్రను ప్రత్యేకంగా ఆవిష్కరిస్తుంది.
ట్రైలర్లో 2025 జనవరిలో జరిగిన ప్రమాణస్వీకార దినోత్సవ దృశ్యాలు ఉన్నాయి. అమెరికా క్యాపిటల్ వద్ద జరిగిన ఆ కార్యక్రమంలో ఆమె నేవీ రంగు విస్తృత అంచుల టోపీ ధరించిన దృశ్యం ప్రత్యేక ఆకర్షణగా నిలుస్తుంది. అలాగే, అధ్యక్షుడికి సలహాదారురాలిగా ఆమె పోషించిన పాత్రను కూడా ఈ చిత్రం చూపిస్తుంది. ముఖ్యంగా ప్రమాణస్వీకార ప్రసంగంలో “శాంతి సాధకుడు, ఐక్యత సాధించే నేత” అనే పదాలను ప్రస్తావించాలంటూ ఆమె ట్రంప్కు సూచించిన ఘట్టం ఇందులో ఉంది.
ఈ చిత్రాన్ని మార్క్ బెక్మన్ నిర్మించగా, అమెజాన్ MGM స్టూడియోస్తో కుదిరిన సుమారు 40 మిలియన్ డాలర్ల ఒప్పందాన్ని ఆయన పర్యవేక్షించారు. అంతేకాదు, ఈ ఏడాది చివర్లో విడుదల కానున్న మరో డాక్యుమెంటరీ సిరీస్ కూడా రూపొందనుంది. అందులో పిల్లల ఫోస్టర్ కేర్ వంటి మెలానియా ట్రంప్ ప్రాధాన్యత అంశాలపై దృష్టి సారించనున్నారు. “ఇది రాజకీయ చిత్రం కాదు.
సృజనాత్మక దిశను స్వయంగా ఫస్ట్ లేడీనే నడిపించారు,” అని బెక్మన్ స్పష్టం చేశారు. ఈ చిత్రంలో మెలానియా ఫ్యాషన్ ఎంపికలు, దౌత్య కార్యక్రమాలు, సీక్రెట్ సర్వీస్ భద్రతకు సంబంధించిన వ్యవహారాలు కూడా ప్రధానంగా చూపించనున్నారు. అలాగే అధ్యక్షుడు ట్రంప్ హాస్యభావం ప్రతిబింబించే కొన్ని సందర్భాలు కూడా ప్రేక్షకులకు కనిపిస్తాయని నిర్మాత తెలిపారు.
చిత్రం థియేటర్లలో విడుదలకు ముందుగా, గురువారం రోజున వాషింగ్టన్లోని జాన్ ఎఫ్. కెన్నెడీ సెంటర్ ఫర్ ది పెర్ఫార్మింగ్ ఆర్ట్స్లో (ట్రంప్ నియమించిన బోర్డు దానిని “ట్రంప్–కెన్నెడీ సెంటర్”గా పేరు మార్చింది) ప్రత్యేక ప్రీమియర్ నిర్వహించనున్నారు. ఇందులో అధ్యక్షుడు, ఫస్ట్ లేడీ ఇద్దరూ పాల్గొననున్నారు. అలాగే ఈ చిత్ర ప్రచారంలో భాగంగా బుధవారం న్యూయార్క్ స్టాక్ ఎక్స్ఛేంజ్ ప్రారంభ ఘంటికను మెలానియా ట్రంప్ మోగించనున్నారు అని బెక్మన్ తెలిపారు.
