ప్రముఖ టాలీవుడ్ నిర్మాత, నటుడు బండ్ల గణేష్ ఇంట్లో పెళ్లి సందడి మొదలైంది. ఆయన కుమార్తె జనని నిశ్చితార్థ వేడుక హైదరాబాద్‌లో అత్యంత వైభవంగా నిర్వహించబడింది. ఈ శుభకార్యానికి ఆంధ్రప్రదేశ్ ముఖ్యమంత్రి నారా చంద్రబాబు నాయుడు, ఆయన సతీమణి నారా భువనేశ్వరి ముఖ్య అతిథులుగా హాజరై ప్రత్యేక ఆకర్షణగా నిలిచారు. వేడుకకు విచ్చేసిన సీఎం దంపతులకు బండ్ల గణేష్ కుటుంబ సభ్యులు సాదర స్వాగతం పలికారు. కాబోయే వధూవరులు జనని, చిలుకూరి సూర్యతేజలను చంద్రబాబు నాయుడు, భువనేశ్వరి దంపతులు నిండు మనసుతో ఆశీర్వదించారు.
ఈ కార్యక్రమంలో ఇరు కుటుంబాలకు చెందిన సన్నిహితులు, బంధువులతో పాటు పలువురు రాజకీయ, సినీ రంగ ప్రముఖులు పాల్గొని నూతన వధూవరులకు శుభాకాంక్షలు తెలియజేశారు. బండ్ల గణేష్ తన కుమార్తె నిశ్చితార్థాన్ని అత్యంత ప్రతిష్టాత్మకంగా నిర్వహించడమే కాకుండా, స్వయంగా ముఖ్యమంత్రి దంపతులు విచ్చేసి ఆశీర్వదించడంతో ఆయన ఆనందం వ్యక్తం చేశారు. ప్రస్తుతం ఈ వేడుకకు సంబంధించిన ఫోటోలు, వీడియోలు సోషల్ మీడియాలో వైరల్ అవుతున్నాయి. ముఖ్యమంత్రి హోదాలో ఉండి కూడా బండ్ల గణేష్ ఆహ్వానాన్ని మన్నించి ఈ కార్యక్రమానికి హాజరుకావడం పట్ల సినీ వర్గాల్లో ఆసక్తికర చర్చ సాగుతోంది.
