“లవ్ ఇన్సూరెన్స్” ఈ పదం విన్నారా? ఇప్పటి వరకూ విని ఉండకపోతే ఈ వార్త చదవండి. ఇక ఈ ట్రెండ్ పెరిగిపోవడం ఖాయం. చైనాలో ఒక మహిళ దాదాపు 10 సంవత్సరాల క్రితం కొనుగోలు చేసిన అరుదైన “లవ్ ఇన్సూరెన్స్” పాలసీపై విజయవంతంగా క్లెయిమ్ పొందింది. షాన్సీ ప్రావిన్స్లోని షీన్ నగరానికి చెందిన వూ (Wu) అనే మహిళ, 2016లో తన అప్పటి బాయ్ఫ్రెండ్ వాంగ్ (Wang) కోసం బహుమతిగా ఈ పాలసీని కొనుగోలు చేసింది.
ఇందుకు ఆమె 199 యువాన్లు (సుమారు 28 అమెరికన్ డాలర్లు) చెల్లించింది. అసలు ధర 299 యువాన్లు అయినప్పటికీ, డిస్కౌంట్లో ఈ పాలసీ దొరికిందని ఆమె తెలిపింది. అప్పట్లో వాంగ్ దీనిపై అనుమానం వ్యక్తం చేస్తూ, ఇది మోసం కావచ్చని భావించాడు. వూ, వాంగ్ ఇద్దరూ సెకండరీ స్కూల్ రోజుల నుంచే పరిచయం. తరువాత అదే విశ్వవిద్యాలయంలో చదువుకున్నారు. 2015లో వారు అధికారికంగా ప్రేమలోకి వచ్చారు. ఈ పాలసీని చైనా లైఫ్ ప్రాపర్టీ అండ్ క్యాజువాల్టీ ఇన్సూరెన్స్ కంపెనీ జారీ చేసింది. పాలసీ నిబంధనల ప్రకారం, పాలసీ మూడవ వార్షికోత్సవం తర్వాత 10 సంవత్సరాల లోపు వారు పెళ్లి చేసుకుంటే బహుమతి లభిస్తుంది. ఆ బహుమతి ఏమిటంటే
10,000 రోజాలు,
ఒక డైమండ్ ఉంగరం,
లేదా 10,000 యువాన్ల నగదు
దాదాపు పదేళ్ల ప్రేమ తర్వాత, 2025 అక్టోబర్లో వూ మరియు వాంగ్ తమ వివాహాన్ని అధికారికంగా నమోదు చేసుకున్నారు. రోజాలు నిల్వ చేయడం కష్టం కాబట్టి, వారు నగదు బహుమతినే ఎంచుకున్నారు. ఇన్సూరెన్స్ కంపెనీ ప్రకారం, ఈ “లవ్ ఇన్సూరెన్స్” ఉత్పత్తిని 2017లోనే నిలిపివేశారు. అయితే, ఆకు ముందు జారీ చేసిన పాలసీలు ఇప్పటికీ చెల్లుబాటు అవుతాయని స్పష్టం చేసింది.
ఈ ఘటన సోషల్ మీడియాలో చర్చనీయాంశంగా మారింది. చాలామంది నెటిజన్లు “ఇలాంటి ఇన్సూరెన్స్ గురించి అప్పట్లో తెలిసి ఉంటే బాగుండేది” అంటూ సరదాగా వ్యాఖ్యానించారు. చైనాలో “లవ్ ఇన్సూరెన్స్” అనేది సాధారణ బీమా కంటే ఎక్కువగా ఒక వినూత్న మార్కెటింగ్ ఆలోచనగా, ప్రేమకు సంబంధించిన ఒక రకమైన పందెం లేదా హామీ బహుమతిగా భావించబడింది. ఇటువంటి ఉత్పత్తులలో చాలావరకు తర్వాతి కాలంలో నియంత్రణల వల్ల మార్కెట్ నుంచి తొలగించబడ్డాయి. అయినప్పటికీ, పాత పాలసీలను కొందరు ఇప్పటికీ క్లెయిమ్ చేస్తుండగా, కంపెనీలు వాటిని గౌరవిస్తున్నాయి.
