న్యూజిలాండ్ రాజధాని వెల్లింగ్టన్ విమానాశ్రయంలో భారీ విమాన ప్రమాదం తృటిలో తప్పింది. ఎయిర్ న్యూజిలాండ్కు చెందిన ఎన్జెడ్-272 విమానం ల్యాండింగ్కు సిద్ధమవుతున్న సమయంలో ఒక్కసారిగా భారీ వర్షం, బలమైన ఈదురు గాలులు వీచడంతో ప్రమాదకర పరిస్థితులు ఏర్పడ్డాయి. అయితే పైలట్ అప్రమత్తంగా వ్యవహరించడంతో వందలాది మంది ప్రయాణికులు సురక్షితంగా బయటపడ్డారు.
విమానం రన్వేను తాకబోతున్న క్షణంలోనే గాలి వేగంలో ఆకస్మిక మార్పులు చోటుచేసుకోవడంతో ల్యాండింగ్ కొనసాగితే ప్రమాదం జరిగే అవకాశం ఉందని పైలట్ వెంటనే గుర్తించారు. కేవలం కొన్ని క్షణాల్లోనే నిర్ణయం తీసుకుని ల్యాండింగ్ను నిలిపివేసి విమానాన్ని మళ్లీ ఆకాశంలోకి ఎగరేశారు. ఈ అత్యవసర చర్యతో సంభవించే ప్రమాదం తప్పినట్లు అధికారులు తెలిపారు.
పైలట్ సమయస్ఫూర్తి, నైపుణ్యంతో విమానం సురక్షితంగా మళ్లీ గాల్లోకి వెళ్లి, వాతావరణ పరిస్థితులు అనుకూలించిన అనంతరం విజయవంతంగా దిగినట్లు సమాచారం. ఈ ఘటనలో ఎలాంటి ప్రాణనష్టం గానీ, గాయాలు గానీ సంభవించలేదు.
విమానంలో ఉన్న ప్రయాణికులు పైలట్ను ప్రశంసిస్తూ, ఆయన సమయోచిత నిర్ణయం తమ ప్రాణాలను కాపాడిందని తెలిపారు. పలువురు ప్రయాణికులు ఆయనను దేవుడి రూపంలో వచ్చి రక్షించిన వ్యక్తిగా అభివర్ణించారు. విమానాశ్రయ సిబ్బంది కూడా పైలట్ అప్రమత్తతను అభినందిస్తూ, క్లిష్ట పరిస్థితుల్లో ఆయన ప్రదర్శించిన వృత్తి నైపుణ్యం ప్రమాదాన్ని పూర్తిగా నివారించిందని పేర్కొన్నారు.
