రెండు హైస్పీడ్‌ రైళ్లు ఢీకొన్న ఘోర ప్రమాదంలో 64 మంది మృతి చెందిన సంఘటన స్పెయిన్‌లో జరిగింది. ప్రాథమిక సమాచారం ప్రకారం, ప్రైవేటు సంస్థల సమాఖ్య అయిన ఇరియో నిర్వహిస్తున్న రైలును సిగ్నల్‌ వ్యవస్థలో లోపం కారణంగా మౌలిక సదుపాయాల నిర్వహణ సంస్థ ఏడీఐఎఫ్‌ ఆదేశాల మేరకు టొలెడో సమీపంలో నిలిపివేశారు. ఆ తర్వాత రెన్ఫే సంస్థ నిర్వహిస్తున్న మరో హైస్పీడ్‌ రైలు వేగంగా వచ్చి నిలిచిపోయిన రైలును ఢీకొట్టినట్లు విపత్తు గురించి సమాచారం తెలిసిన వ్యక్తి వెల్లడించారు. ఈ ఘటనలో రెండు రైళ్లకు చెందిన పలు బోగీలు పట్టాలు తప్పాయి.
ప్రమాదానికి సంబంధించిన పూర్తి వివరాలు ఇంకా నిర్ధారణ కావాల్సి ఉంది. తమ రైలుకు ప్రయాణాన్ని కొనసాగించేందుకు అనుమతి ఇచ్చిన తర్వాతే అది నిలిచిపోయిన ఇరియో రైలును ఢీకొట్టిందని రెన్ఫే సంస్థ ఒక ప్రకటనలో తెలిపింది. ఇరియో రైలు ఎందుకు నిలిచిపోయిందన్న విషయం తమకు తెలియదని పేర్కొంది. తమ రైలు అధికారుల సూచనల మేరకు ప్రయాణాన్ని కొనసాగిస్తుండగా ఢీకొన్న ఘటన జరిగిందని వివరించింది.
ప్రమాద సమయంలో రైలులో ప్రయాణిస్తున్న మిగ్యుయెల్‌ అనే వ్యక్తి తన అనుభవాన్ని స్థానిక రేడియో సంస్థ కోపేకు వివరించారు. తాను కొంతమంది సహోద్యోగులతో కలిసి ఒక రైలులోని వెనుక బోగీలో ప్రయాణిస్తున్నానని చెప్పారు. ఒక్కసారిగా భారీ శబ్దం వినిపించిందని, దాదాపు పది సెకన్లపాటు భయంకరమైన ఢీకొన్న శబ్దం కొనసాగిందని తెలిపారు. రైలు పట్టాలు తప్పబోతోందని భావించామని, కుడివైపు కిటికీలో నుంచి చూడగా మరో రైలు తీవ్రంగా ధ్వంసమైన స్థితిలో కనిపించిందని వివరించారు.
ప్రమాద స్థలంలో వందలాది అంబులెన్సులు, మృతదేహాలను తరలించే వాహనాలు, హెలికాప్టర్లు మోహరించాయి. ఒక రైలు బోగీలు ఎత్తైన రైల్వే మార్గంపై నిలిచిపోయి ఉండగా, మరోవైపు రైల్వే మార్గం కింద ఉన్న వాలు ప్రాంతంలో ఇనుప భాగాలు, విరిగిపోయిన ప్యానెళ్లు, ఇతర శిథిలాలు చెల్లాచెదురుగా పడ్డాయి. కనీసం మూడు బోగీలు పట్టాలపై నుంచి జారి కిందకు పడిపోయినట్లు సమాచారం. సహాయక బృందాలు శిథిలాల మధ్య చిక్కుకున్నవారి కోసం గాలింపు చర్యలు కొనసాగిస్తున్నాయి.
