ప్రధాని నరేంద్రమోడీ అధ్యక్షతన జరిగిన కేంద్ర మంత్రివర్గ సమావేశం కేంద్ర ప్రభుత్వ ఉద్యోగులకు సంబంధించి కీలక నిర్ణయం తీసుకున్నది. కేంద్ర ప్రభుత్వ ఉద్యోగులకు కరువు భత్యం (డీఏ), పెన్షనర్లకు కరువు భత్యం (డీఆర్) అదనపు విడత విడుదలకు కేంద్ర మంత్రి వర్గం ఆమోదం తెలిపింది.
ఈ పెంపు 2026 జూలై 1 నుంచి అమల్లోకి వస్తుంది. ప్రస్తుతం ప్రాథమిక వేతనం, పెన్షన్‌పై 60 శాతంగా ఉన్న డీఏ, డీఆర్‌ను మరో 3 శాతం పెంచడంతో మొత్తం 63 శాతానికి చేరుతుంది. పెరుగుతున్న ధరల ప్రభావాన్ని తగ్గించి ఉద్యోగులు, పెన్షనర్లకు ఆర్థికంగా కొంత ఊరట కల్పించడమే ఈ నిర్ణయం ఉద్దేశం.
ఈ నిర్ణయం కారణంగా కేంద్ర ప్రభుత్వ ఖజానాపై ఏడాదికి అదనంగా రూ.10,016.10 కోట్ల భారం పడనుంది. ఈ నిర్ణయంతో సుమారు 48.54 లక్షల మంది కేంద్ర ప్రభుత్వ ఉద్యోగులు, 68.71 లక్షల మంది పెన్షనర్లు ప్రయోజనం పొందనున్నారు.
ఏడవ కేంద్ర వేతన సంఘం సిఫారసుల ఆధారంగా ఈ పెంపు చేపట్టినట్లు కేంద్ర ప్రభుత్వం వెల్లడించింది. కేంద్ర ప్రభుత్వం సాధారణంగా ప్రతి ఏడాది జనవరి, జూలై నెలల్లో డీఏ, డీఆర్‌లను సవరిస్తుంది. ఉద్యోగుల ప్రాథమిక వేతనానికి అనుగుణంగా డీఏ చెల్లిస్తుండగా, పదవీ విరమణ చేసిన వారికి పెన్షన్‌పై డీఆర్ అందజేస్తారు. నిత్యావసర వస్తువుల ధరలు పెరగడం వల్ల జీవన వ్యయాలు అధికమవుతున్న నేపథ్యంలో ఆ భారాన్ని కొంతవరకు తగ్గించేందుకు ఈ భత్యాలను పెంచుతారు.
