కోలీవుడ్ స్టార్ హీరో, తమిళగ వెట్రి కళగం (TVK) అధినేత దళపతి విజయ్ తన సినీ ప్రయాణంపై కీలక ప్రకటన చేశారు. హెచ్. వినోద్ దర్శకత్వంలో తెరకెక్కుతున్న ‘జన నాయగన్’ చిత్రమే తన కెరీర్‌లో చివరి సినిమా అని ఆయన స్పష్టం చేశారు.
మలేషియాలో శనివారం (డిసెంబర్ 27, 2025) అత్యంత వైభవంగా జరిగిన ఈ చిత్ర ఆడియో విడుదల వేడుకలో విజయ్ తన నిర్ణయాన్ని ప్రకటించారు. సుమారు 30 ఏళ్ల పాటు తనను ఆదరించి, అగ్ర కథానాయకుడిగా నిలబెట్టిన అభిమానుల కోసం ఇకపై పూర్తి సమయం రాజకీయాలకే కేటాయిస్తానని ఆయన తెలిపారు.
“ఇంతకాలం నన్ను వెండితెరపై చూసి ఆదరించారు. ఇకపై మరో 30 ఏళ్ల పాటు మీ కోసం, మీకు సేవ చేసేందుకు రాజకీయ క్షేత్రంలో ఒక సామాన్య సేవకుడిగా మీ ముందు నిలబడతాను” అని విజయ్ ఎమోషనల్ అయ్యారు.ప్రస్తుతం షూటింగ్ పూర్తి చేసుకున్న ‘జన నాయగన్’ చిత్రం 2026 సంక్రాంతి కానుకగా జనవరి 9న ప్రపంచవ్యాప్తంగా విడుదల కానుంది.
ఈ సినిమా అనంతరం విజయ్ పూర్తిస్థాయిలో తన పార్టీ కార్యక్రమాలపై దృష్టి సారించి, 2026 తమిళనాడు అసెంబ్లీ ఎన్నికల్లో పోటీకి సిద్ధం కానున్నారు. సినిమాలకు స్వస్తి పలికి ప్రజా సేవలోకి వస్తున్న తన అభిమాన హీరో నిర్ణయానికి అభిమానులు భారీ స్థాయిలో మద్దతు తెలుపుతున్నారు.
