ఆసియా నుంచి అమెరికా వరకు పలు దేశాల్లో మైక్రోసాఫ్ట్‌కు చెందిన ఔట్‌లుక్, టీమ్స్, ఏఐ సహాయక సేవ కోపైలట్ సహా పలు సేవలు గంటల తరబడి నిలిచిపోయాయి. దీంతో వ్యక్తిగత వినియోగదారులతో పాటు అనేక సంస్థలు, కొన్ని ప్రభుత్వ విభాగాల కార్యకలాపాలపైనా ప్రభావం పడింది. సమస్యను పరిష్కరించేందుకు మైక్రోసాఫ్ట్ ఇంజినీర్లు తీవ్రంగా ప్రయత్నిస్తున్నప్పటికీ పూర్తిస్థాయిలో సేవలను పునరుద్ధరించడంలో జాప్యం జరిగింది.
శుక్రవారం విడుదల చేసిన ప్రకటనలో మైక్రోసాఫ్ట్ 365 సేవల్లో విస్తృత అంతరాయం ఏర్పడినట్లు సంస్థ వెల్లడించింది. ముఖ్యంగా ఎక్స్ఛేంజ్ ఆన్‌లైన్, ఈమెయిల్ సేవలతో అనుసంధానమైన వ్యవస్థలపై ఈ ప్రభావం పడినట్లు తెలిపింది. ఔట్‌లుక్, టీమ్స్, కోపైలట్ సేవలు పనిచేయడం లేదని పలువురు వినియోగదారులు ఫిర్యాదు చేశారు. సమస్యకు అసలు కారణాన్ని గుర్తించేందుకు వివిధ మార్గాల్లో పరిశీలన జరుపుతున్నామని, ప్రభావితమైన సర్వర్లను తిరిగి అందుబాటులోకి తీసుకువచ్చేందుకు జాగ్రత్తగా చర్యలు చేపడుతున్నామని సంస్థ పేర్కొంది.
ప్రపంచ వ్యాప్తంగా తీవ్ర ఇబ్బందులు
ప్రపంచవ్యాప్తంగా మైక్రోసాఫ్ట్ సేవల్లో తలెత్తిన సాంకేతిక సమస్యలు లక్షలాది మంది వినియోగదారులను తీవ్ర ఇబ్బందులకు గురిచేశాయి. అయితే ఎయిరిండియా విమాన కార్యకలాపాలకు ఎలాంటి ఆటంకం కలగలేదని స్పష్టం చేసింది. ప్రయాణికుల నుంచి వచ్చే ప్రశ్నలు, సందేహాలకు సమాధానాలు అందించడంలో అంతరాయం లేకుండా ఉండేందుకు తాత్కాలికంగా తమ ఈమెయిల్ సేవలను ప్రత్యామ్నాయ వ్యవస్థకు మళ్లించినట్లు వెల్లడించింది. మరోవైపు ఇండిగో సంస్థ తన ఈమెయిల్ ఆధారిత కస్టమర్ సపోర్ట్ సేవల్లో అంతరాయం ఏర్పడినట్లు తెలిపింది. దీంతో ప్రయాణికుల ప్రశ్నలను స్వీకరించడంలో ఇబ్బందులు ఎదురయ్యాయని, అయితే ఇతర సహాయ మార్గాలు అందుబాటులో ఉన్నాయని పేర్కొంది.
మైక్రోసాఫ్ట్ ఎదుర్కొంటున్న ఈ సమస్య వెనుక ఎలాంటి సైబర్ దాడి ఉన్నట్లు ఆధారాలు లేవని వెల్లడించింది. అయినప్పటికీ సమస్యను అత్యంత ప్రాధాన్యతతో పరిష్కరిస్తామని తెలిపింది. ప్రపంచవ్యాప్తంగా 43 కోట్ల మందికి పైగా వినియోగదారులు మైక్రోసాఫ్ట్ 365 అప్లికేషన్లను ఉపయోగిస్తున్నట్లు సంస్థ తన వెబ్‌సైట్‌లో పేర్కొంది. ఈ అంతరాయం కారణంగా గురువారం ఒక్కరోజే డజన్ల కొద్దీ దేశాల నుంచి సుమారు 1.30 లక్షల మంది వినియోగదారులు ఔట్‌లుక్ సేవల్లో సమస్యలు ఎదుర్కొన్నట్లు అంతరాయాలను నమోదు చేసే వెబ్‌సైట్ వెల్లడించింది.
సాంకేతిక ఇబ్బందులతో సమస్య తీవ్రతరం
సమస్యను పూర్తిగా అదుపులోకి తీసుకురావడంలో సాంకేతిక బృందాలు ఇబ్బందులు ఎదుర్కొంటున్నట్లు సంస్థ వరుస ప్రకటనలు సూచించాయి. సేవల పనితీరును మెరుగుపరిచేందుకు చేసిన మార్పులు ఆశించిన ఫలితాలను ఇవ్వలేదని తొలుత వెల్లడించిన సంస్థ, తాజాగా పరిస్థితిలో కొంత స్థిరత్వం కనిపిస్తోందని, సేవల సామర్థ్యం క్రమంగా మెరుగుపడుతోందని తెలిపింది.
ఈ అంతరాయం అమెరికాలోని పారిశ్రామిక సాంకేతిక సంస్థ వర్క్‌హార్స్ గ్రూప్ కార్యకలాపాలపైనా ప్రభావం చూపింది. త్రైమాసిక ఆర్థిక ఫలితాలపై నిర్వహించాల్సిన సమావేశాన్ని సంస్థ వాయిదా వేసింది. ఆస్ట్రేలియాలో కూడా ఈ వ్యవహారం చర్చనీయాంశమైంది. మైక్రోసాఫ్ట్‌లోని ఆస్ట్రేలియా ఉన్నతాధికారితో, ప్రభుత్వ జాతీయ సైబర్ భద్రత సమన్వయకర్తతో మాట్లాడినట్లు ఆ దేశ హోం వ్యవహారాల మంత్రి టోనీ బర్క్ వెల్లడించారు. 2024లో ప్రపంచవ్యాప్తంగా తీవ్ర అంతరాయం సృష్టించిన క్రౌడ్‌స్ట్రైక్ ఘటన తరహాలోనే ప్రస్తుత సమస్య కూడా ఒక సాంకేతిక నవీకరణలో తలెత్తిన లోపం వల్ల జరిగి ఉండవచ్చని మైక్రోసాఫ్ట్ భావిస్తున్నట్లు ఆయన తెలిపారు. అయితే ఇది సైబర్ దాడి కాదని సంస్థ భావిస్తున్నట్లు చెప్పారు.
రెండేళ్ల కిందట కూడా ఇదే సమస్య…
2024 జూలైలో క్రౌడ్‌స్ట్రైక్ సంస్థ విడుదల చేసిన లోపభూయిష్ట సాఫ్ట్‌వేర్ నవీకరణ కారణంగా ప్రపంచవ్యాప్తంగా విమానయాన, ఆసుపత్రులు, బ్యాంకులు, రిటైల్ సంస్థల కార్యకలాపాలు తీవ్రంగా దెబ్బతిన్నాయి. మైక్రోసాఫ్ట్ విండోస్ ఆధారిత కంప్యూటర్లకు తప్పుడు సమాచారం చేరడంతో లక్షలాది కంప్యూటర్లు పనిచేయకుండా పోయాయి. ఆ ఘటన ప్రపంచ సాంకేతిక వ్యవస్థలపై తీవ్ర ప్రభావం చూపిన విషయం తెలిసిందే.
హాంకాంగ్‌లోనూ ప్రస్తుత అంతరాయం వ్యాపార కార్యకలాపాలను ప్రభావితం చేసింది. అల్యూమినియం పరిశ్రమ నిర్వహిస్తున్న వ్యాపారవేత్త డానీ లా మాట్లాడుతూ, తమ సంస్థకు చెందిన ఔట్‌లుక్ ఖాతాలకు అమెరికా వినియోగదారుల నుంచి వచ్చే సమాచారం అందడం లేదని తెలిపారు. సమస్య మరింతకాలం కొనసాగితే ఉత్పత్తి కార్యకలాపాల షెడ్యూల్‌పై ప్రభావం పడే అవకాశం ఉందని ఆందోళన వ్యక్తం చేశారు. హాంకాంగ్‌లోని కొన్ని బ్యాంకుల కార్యకలాపాల్లోనూ అంతరాయాలు నమోదయ్యాయి.
ఈమెయిల్ సేవలు నిలిచిపోయినట్లు సింగపూర్ ప్రభుత్వ సాంకేతిక సంస్థ కూడా వెల్లడించింది. సమస్యను పరిష్కరించేందుకు మైక్రోసాఫ్ట్‌తో కలిసి పనిచేస్తున్నట్లు తెలిపింది. ప్రపంచవ్యాప్తంగా కోట్లాది మంది ఆధారపడుతున్న డిజిటల్ సేవల్లో ఏర్పడిన ఈ అంతరాయం, ఆధునిక ప్రభుత్వ, వ్యాపార కార్యకలాపాలు ఒకే సాంకేతిక వ్యవస్థపై ఎంతగా ఆధారపడి ఉన్నాయో మరోసారి స్పష్టం చేసింది.
