మధ్యప్రాచ్యంలోని యుద్ధ పరిణామాల కారణంగా ప్రపంచ దేశాలకు చమురు సరఫరాలో భారీ అంతరాయం ఏర్పడింది. ప్రస్తుత పరిస్థితుల్లో చమురు సరఫరా వ్యవస్థ తీవ్ర ఒత్తిడికి గురవుతోందని, ప్రపంచానికి అందుబాటులో ఉన్న అదనపు సరఫరా సామర్థ్యం చాలా పరిమితంగా మారిందని సౌదీ అరామ్‌కో సీఈఓ అమీన్ నాసర్ అన్నారు.
లండన్‌లో జరిగిన ఎనర్జీ ఇంటెలిజెన్స్ ఫోరమ్‌లో మాట్లాడిన నాసర్ ప్రపంచ చమురు సరఫరాకు ఉన్న భద్రతా నిల్వల వెసులుబాటు ‘భయపెట్టేంత తక్కువగా’ ఉందని వ్యాఖ్యానించారు.
చమురు సరఫరా లోటును భర్తీ చేసేందుకు ఇప్పటికే 100 కోట్ల బ్యారెళ్లకు పైగా నిల్వల నుంచి చమురును మార్కెట్‌లోకి విడుదల చేసినట్లు నాసర్ తెలిపారు. వాణిజ్య నిల్వల్లో ప్రస్తుతం 600 కోట్ల బ్యారెళ్లకు లోపే చమురు మిగిలి ఉండవచ్చని, అందులో కూడా ఎక్కువ భాగం తక్షణ వినియోగానికి అందుబాటులో లేదని చెప్పారు. దేశాలు ప్రకటించే మొత్తం నిల్వల గణాంకాలను మాత్రమే చూసి పరిస్థితి మెరుగ్గా ఉందని భావించకూడదని ఆయన హెచ్చరించారు. అందుబాటులో ఉన్న నిల్వల్లో 10 శాతానికి కూడా తక్కువ మాత్రమే వాస్తవంగా ఉపయోగించుకునే స్థితిలో ఉందని పేర్కొన్నారు.
సంక్షోభం ప్రారంభమైన సమయంలో ప్రపంచవ్యాప్తంగా దాదాపు 1,000 కోట్ల బ్యారెళ్ల చమురు నిల్వలు ఉండగా, యుద్ధం కారణంగా సుమారు 300 కోట్ల బ్యారెళ్ల సరఫరా కోల్పోయినట్లు ఆయన వెల్లడించారు. సాధారణ పరిస్థితుల్లో హోర్ముజ్ జలసంధి ద్వారా తరలించే ముడి చమురు, శుద్ధి చేసిన ఉత్పత్తుల పరిమాణంలో దాదాపు సగానికి సమానమైన సరఫరా ఈ అంతరాయం కారణంగా ప్రభావితమైందని వివరించారు.
అత్యవసర నిల్వలను విడుదల చేయడం తాత్కాలిక ఉపశమనం మాత్రమే కలిగిస్తుందని నాసర్ స్పష్టం చేశారు. ఈ నిల్వలు ఒక శీతాకాలాన్ని గట్టెక్కించేందుకు కొంత సహాయం చేయగలవని, కానీ దీర్ఘకాలికంగా సరఫరా-డిమాండ్ మధ్య ఏర్పడిన అసమతుల్యతను పరిష్కరించలేవని అన్నారు. హోర్ముజ్ జలసంధి పూర్తిగా తెరుచుకుని చమురు రవాణా సాధారణ స్థితికి వచ్చినప్పటికీ, ప్రపంచ దేశాలు తమ చమురు నిల్వలను తిరిగి పునరుద్ధరించుకోవడానికి రెండు సంవత్సరాల వరకు పట్టే అవకాశం ఉందని ఆయన హెచ్చరించారు.
మధ్యప్రాచ్యం నుంచి ముడి చమురు ఎగుమతులు కొంతమేర పుంజుకున్నాయి. హోర్ముజ్ జలసంధి ద్వారా చమురు రవాణా కూడా యుద్ధానికి ముందు స్థాయిలో దాదాపు 80 శాతానికి చేరినట్లు రాయిటర్స్ నివేదించింది. అయితే ట్యాంకర్లకు పెరుగుతున్న బీమా, రవాణా ఖర్చులు, ప్రత్యామ్నాయ మార్గాల వినియోగం, శుద్ధి కేంద్రాల సామర్థ్య పరిమితులు వంటి అంశాలు ప్రపంచ చమురు మార్కెట్‌పై ఒత్తిడిని కొనసాగిస్తున్నాయి.
ప్రపంచ ఇంధన మార్కెట్‌లో ముఖ్యంగా డీజిల్ సరఫరాపై ఒత్తిడి ఎక్కువగా ఉందని నాసర్ పేర్కొన్నారు. ముడి చమురు సరఫరా కొంత పుంజుకున్నప్పటికీ, శుద్ధి చేసిన ఇంధన ఉత్పత్తుల రవాణా, లభ్యతలో ఇంకా తీవ్ర ఇబ్బందులు కొనసాగుతున్నాయని అంతర్జాతీయ ఇంధన సంస్థ కూడా పేర్కొంది. దీంతో అత్యవసర నిల్వల విడుదలతో స్వల్పకాలికంగా మార్కెట్‌కు ఊరట లభించినా, దీర్ఘకాలిక ఇంధన భద్రతకు మాత్రం మరిన్ని చర్యలు అవసరమని నిపుణులు చెబుతున్నారు.
ప్రత్యామ్నాయ ఎగుమతి మార్గాలను, అదనపు విదేశీ నిల్వ సదుపాయాలను పరిశీలిస్తున్నట్లు అమీన్ నాసర్ తెలిపారు. ప్రపంచ చమురు వ్యవస్థ ఇప్పటికే తీవ్ర ఒత్తిడిలో ఉన్న నేపథ్యంలో భౌగోళిక రాజకీయ ఉద్రిక్తతలు మరింత పెరిగితే సరఫరా వ్యవస్థపై ప్రభావం తీవ్రంగా ఉండవచ్చని ఆయన హెచ్చరించారు.
