గత కొద్ది రోజులుగా ప్రపంచవ్యాప్తంగా కోట్లాది మంది వినియోగదారులను ఇబ్బందులకు గురిచేసిన మైక్రోసాఫ్ట్ సేవల అంతరాయం పూర్తిగా తొలగిపోయింది. శనివారం ఉదయం నాటికి మైక్రోసాఫ్ట్‌కు చెందిన అన్ని ఉత్పత్తులు, సేవలు తిరిగి అందుబాటులోకి వచ్చినట్లు సంస్థ వెల్లడించింది. మైక్రోసాఫ్ట్ 365, ఔట్‌లుక్ ఈమెయిల్‌తో పాటు వ్యాపార, వ్యక్తిగత వినియోగదారులకు సంబంధించిన అన్ని సేవలు సాధారణ స్థితికి చేరుకున్నట్లు ప్రకటించింది.
సైబర్ దాడులు, కృత్రిమ మేధ లేదా ఏఐ ఆధారిత వ్యవస్థలతో ఈ సమస్యకు ఎలాంటి సంబంధం లేదని మైక్రోసాఫ్ట్ స్పష్టం చేసింది. గతంలో నెట్‌వర్క్ సామర్థ్యాన్ని పెంచేందుకు చేపట్టిన నవీకరణ సమయంలో ఏర్పడిన సాంకేతిక సమస్యే ప్రస్తుత అంతరాయానికి కారణమని వివరించింది. ఇటీవల నెట్‌వర్క్‌లో చేసిన మార్పుల నేపథ్యంలో గతంలో ఏర్పడిన లోపం బయటపడిందని తెలిపింది.
ప్రపంచవ్యాప్తంగా భారీ సంఖ్యలో వినియోగదారులు ఒకేసారి సేవలను వినియోగించుకునేందుకు ప్రయత్నించడంతో వాటిని దశలవారీగా పునరుద్ధరించాల్సి వచ్చిందని వెల్లడించింది. ప్రతి దశలోనూ సేవల స్థిరత్వాన్ని పరిశీలించిన తర్వాతే తదుపరి సేవలను అందుబాటులోకి తెచ్చినట్లు తెలిపింది. దీనివల్ల పునరుద్ధరణకు కొంత ఎక్కువ సమయం పట్టినప్పటికీ, సేవలు మళ్లీ అంతరాయం లేకుండా పనిచేసేందుకు ఈ విధానం దోహదపడిందని పేర్కొంది.
మైక్రోసాఫ్ట్ ఉపాధ్యక్షుడు చార్లెస్ లమన్నా ఈ ఘటనపై స్పందిస్తూ, నెట్‌వర్క్ వ్యవస్థలో తలెత్తిన సాంకేతిక సమస్యలు, ఒక సమస్య మరికొన్ని సమస్యలకు దారితీసే పరిణామాలు, ఒకేసారి భారీ సంఖ్యలో వినియోగదారులు సేవలను తిరిగి పొందేందుకు ప్రయత్నించడం వల్ల పునరుద్ధరణ ప్రక్రియ మరింత క్లిష్టంగా మారిందని వివరించారు. ఇంజినీరింగ్ బృందంతో కలిసి సమగ్ర విచారణ చేపడుతున్నామని, ఈ ఘటనకు సంబంధించిన పూర్తి కాలక్రమం, లోపాలు, భవిష్యత్తులో ఇలాంటి అంతరాయాలు పునరావృతం కాకుండా తీసుకోబోయే చర్యలతో కూడిన నివేదికను త్వరలో విడుదల చేస్తామని తెలిపారు.
అంతరాయం సమయంలో నిలిచిపోయిన ఈమెయిళ్లు, పంపిణీ ఆలస్యమైన సందేశాలన్నీ సక్రమంగా వినియోగదారులకు చేరుతున్నాయా లేదా అన్న అంశాన్ని ప్రత్యేకంగా పరిశీలించింది. ఈమెయిల్ సందేశాల నిల్వ, పంపిణీ ప్రక్రియ పూర్తిగా సాధారణ స్థితికి చేరిన తర్వాతే సమస్య పరిష్కారమైనట్లు నిర్ధారించుకోవాలని నిర్ణయించింది.
గురువారం అర్ధరాత్రి సమయంలో ప్రారంభమైన ఈ అంతరాయం భారత్‌లోనూ విమానయాన సంస్థలు, ఆర్థిక సేవల సంస్థలు, వివిధ వ్యాపార కార్యకలాపాలపై ప్రభావం చూపింది. ఇండిగో, ఎయిర్ ఇండియా, ఆకాసా ఎయిర్ వంటి విమానయాన సంస్థలు ఈమెయిల్ ఆధారిత వినియోగదారుల సేవల్లో సమస్యలను ఎదుర్కొన్నాయి. ప్రయాణికుల నుంచి వచ్చిన కొన్ని ప్రశ్నలు, ఫిర్యాదులను స్వీకరించడం, వాటికి సమాధానాలు ఇవ్వడంలో ఇబ్బందులు తలెత్తాయి. ఎయిర్ ఇండియా తాత్కాలికంగా తన ఈమెయిల్ సేవలను ప్రత్యామ్నాయ మార్గాలకు మళ్లించి వినియోగదారులతో సమాచార వ్యవస్థను కొనసాగించింది. అయితే విమానాల రాకపోకలపై ఈ అంతరాయం ప్రభావం చూపలేదని వెల్లడించింది.
మొత్తం 365 సేవల ప్రభావితం
ఆర్థిక సేవల సంస్థలు కూడా పరిశోధనా నివేదికలను పొందడం, ఖాతాదారులతో సమాచార మార్పిడి చేయడంలో ఇబ్బందులు ఎదుర్కొన్నాయి. ముఖ్యంగా మైక్రోసాఫ్ట్ క్లౌడ్ ఆధారిత ఈమెయిల్ వ్యవస్థ ఎక్స్ఛేంజ్ ఆన్‌లైన్‌తో అనుసంధానమై ఉన్న మైక్రోసాఫ్ట్ 365 సేవలు ఎక్కువగా ప్రభావితమయ్యాయి. ఔట్‌లుక్ వెబ్‌సైట్‌తో పాటు కంప్యూటర్లలోని అనువర్తనాల ద్వారా తమ మెయిల్ ఖాతాలను తెరవలేకపోయిన వినియోగదారులు తీవ్ర ఇబ్బందులు పడ్డారు. అనేక ఈమెయిళ్ల పంపిణీ కూడా ఆలస్యమైంది.
మైక్రోసాఫ్ట్ ఔట్‌లుక్ సేవల సమస్యలపై 1.3 లక్షలకు పైగా ఫిర్యాదులు నమోదయ్యాయి. ప్రపంచవ్యాప్తంగా 72 నుంచి 74 దేశాల్లో వినియోగదారులు ఈ సమస్యను ఎదుర్కొన్నట్లు నివేదికలు వెల్లడించాయి. సాంకేతికంగా అభివృద్ధి చెందిన సంస్థలు సైతం నెట్‌వర్క్ వ్యవస్థల్లో తలెత్తే చిన్నపాటి లోపాల కారణంగా ప్రపంచవ్యాప్తంగా ఎంతటి ప్రభావాన్ని ఎదుర్కోవాల్సి వస్తుందో ఈ ఘటన మరోసారి స్పష్టం చేసింది.
