సాగు, పంటల పరిరక్షణ, వాతావరణ పరిస్థితులు, సమతుల్య ఎరువుల వినియోగంపై శాస్త్రీయ అవగాహన కల్పించే లక్ష్యంతో తెలంగాణ వ్యవసాయ శాఖ మరో కార్యక్రమానికి శ్రీకారం చుట్టింది. రైతు నేస్తం కార్యక్రమం ప్రత్యేక ఎపిసోడ్‌-111లో వ్యవసాయ, మార్కెటింగ్‌ శాఖల మంత్రి తుమ్మల నాగేశ్వరరావు పాల్గొన్నారు. ఈ సందర్భంగా ‘ఖేత్‌ బచావో అభియాన్‌’ కార్యక్రమాన్ని ప్రారంభించడంతో పాటు 2026-27 పత్తి మార్కెటింగ్‌ సీజన్‌కు సంబంధించి కనీస మద్దతు ధర (ఎంఎస్‌పీ) కొనుగోళ్లపై రైతులకు అవగాహన కల్పించారు.
పత్తి కొనుగోళ్లను సమర్థవంతంగా నిర్వహించేందుకు రాష్ట్ర ప్రభుత్వం చేపట్టిన ఏర్పాట్లపై కాటన్‌ కార్పొరేషన్‌ ఆఫ్‌ ఇండియా (సీసీఐ) అధికారులు వివరించారు. పత్తి కనీస మద్దతు ధర కొనుగోళ్ల విధానం, రైతులు పాటించాల్సిన నిబంధనలు, కొనుగోలు ప్రక్రియలో తీసుకోవాల్సిన జాగ్రత్తలపై రైతులకు అవగాహన కల్పించారు. పత్తి కొనుగోళ్లలో ఎలాంటి ఇబ్బందులు తలెత్తకుండా వ్యవసాయ, మార్కెటింగ్‌ శాఖలతో పాటు సంబంధిత విభాగాల అధికారులు సమన్వయంతో పనిచేసే అంశంపై కూడా చర్చించారు.
ఎల్‌నినో ప్రభావం, వర్షపాత అంచనాలపై భారత వాతావరణ శాఖ శాస్త్రవేత్త రైతులకు కీలక సూచనలు అందించారు. మారుతున్న వాతావరణ పరిస్థితులకు అనుగుణంగా పంటల సాగు, నీటి నిర్వహణ, పంటల పరిరక్షణలో తీసుకోవాల్సిన జాగ్రత్తలను వివరించారు. వాతావరణ మార్పుల కారణంగా పంటలకు ఎదురయ్యే నష్టాలను తగ్గించుకునేందుకు రైతులు అనుసరించాల్సిన పద్ధతులపై అవగాహన కల్పించారు.
ఎరువుల వినియోగం, ప్రకృతి వ్యవసాయం, పంట మార్పిడి వంటి అంశాలపై వ్యవసాయ శాస్త్రవేత్తలు సూచనలు ఇచ్చారు. నేల స్వభావం, పంట అవసరాలకు అనుగుణంగా ఎరువులను వినియోగించడం ద్వారా సాగు ఖర్చులను తగ్గించుకోవడంతో పాటు భూసారాన్ని కాపాడుకోవచ్చనే అంశాలను వివరించారు. ఒకే పంటపై ఆధారపడకుండా ప్రత్యామ్నాయ పంటల సాగు ద్వారా రైతులు ఆదాయ అవకాశాలను మెరుగుపరుచుకునే విధానాలపైనా చర్చించారు.
మామిడి సాగు చేస్తున్న రైతులకు ఉపయోగపడేలా పూత రావడం, కాయలు అభివృద్ధి చెందడం, వాటి సంరక్షణకు అవసరమైన యాజమాన్య పద్ధతులపై శాస్త్రీయ సూచనలు అందించారు. మామిడి తోటల్లో సరైన సమయంలో చేపట్టాల్సిన చర్యలు, పంట నాణ్యతను పెంచుకునేందుకు అనుసరించాల్సిన విధానాలను వివరించారు.
ఈ కార్యక్రమంలో ఉత్తమ మహిళా రైతు అవార్డు గ్రహీతతో ముఖాముఖి నిర్వహించారు. సాగులో సాధించిన విజయాలు, అనుభవాలు, అనుసరించిన పద్ధతులను ఇతర రైతులతో పంచుకునే అవకాశం కల్పించారు. రైతులు ఎదుర్కొంటున్న సమస్యలు, సాగులో వస్తున్న సందేహాలకు వ్యవసాయ శాఖ అధికారులు, ప్రొఫెసర్‌ జయశంకర్‌ తెలంగాణ రాష్ట్ర వ్యవసాయ విశ్వవిద్యాలయం (పీజేటీఎస్‌ఏయూ) శాస్త్రవేత్తలు, సీసీఐ సాంకేతిక నిపుణులు సమాధానాలు ఇచ్చారు.
మంత్రి తుమ్మల నాగేశ్వరరావు ‘ఖేత్‌ బచావో అభియాన్‌’తో పాటు పత్తి కనీస మద్దతు ధర కొనుగోళ్ల కార్యక్రమాన్ని ప్రారంభించి రైతులను ఉద్దేశించి ప్రసంగించారు. పత్తి కొనుగోళ్లలో రైతులకు అవగాహన కల్పించడం, శాస్త్రీయ వ్యవసాయ పద్ధతులను ప్రోత్సహించడం, వాతావరణ మార్పులకు అనుగుణంగా పంటల సాగుపై మార్గదర్శనం చేయడం ఈ ప్రత్యేక రైతు నేస్తం కార్యక్రమం ప్రధాన లక్ష్యాలుగా ఉన్నాయి.
